د سرې مياشتې ټولنې يو چارواکی چې په وروستيو کې د مرستو رسولو لپاره غزني ته تللی و، وايي چې په مالستان او جاغوريو کې د طالبانو جګړه د نورو سيمو له جګړو سره هېڅ توپير نه لري.
وسله والو طالبانو له تېرې نږدې يوې مياشتې راهيسې د اروزګان په خاص اروزګان او د غزني په جاغوريو او مالستان ولسواليو کې جګړه پيل کړې چې يو شمېر هزاره مشران په لوی لاس قومي رنګ ورکوي.
له تېرې يوې اونۍ راهيسې په کابل کې د دې جګړو پر خلاف لاريونونه هم پيل شوي او د يوه مشخص قوم اوسېدونکي حکومت تورنوي چې د دوی امنيت او خونديتابه ته پام نه کوي. دوی وايي چې په مالستان او جاغوريو کې د طالبانو جګړه د هزاره ګانو پر خلاف جګړه ده او حکومت يې بايد مخنيوی وکړي.
د سرې مياشتې د سوېل لوېديځ مرکزي زون رييس سميع الله صديق وايي، له کومې ورځې چې د غزني ولایت په جاغوريو او مالستان ولسوالیو کې جګړه پیل شوې، د افغاني سرې میاشتې ټولنې د یوې خپلواکې، بې پلوه او بې پرې بشرپالې ادارې په توګه د خپل وس او توان په اندازه هڅه کړې، څو اړمنو خلکو ته بشرپاله مرستې ورسوي.
صديق زياتوي، د افغاني سرې میاشتې کارکوونکي د جګړې له لومړیو څخه د مالستان او جاغوریو ولسوالیو ته رسېدلي او د بې ځایه شویو او اړمنو کورنیو په اړه یې خپله ارزیابي پیل کړې. هغه وايي چې له جاغوريو او مالستان څخه ۱۵۰۰ کورنۍ د غزني مرکز ته کډه شوې او په وينا يې چې که هلته جګړه قومي وي، نو ياد شمېر کورنۍ پر کومه لاره د غزني مرکز ته رسېدلې دي.
د سرې مياشتې د سوېل لوېديځ د مرکزي زون رييس وايي، کارمندان او رضاکاران یې د جاغوريو او مالستان ټولو سیمو ته د بشري وضعیت د ارزیابۍ په موخه تللي، خو تر اوسه هېڅ داسې څه نه دي لیدل شوي څو دا ثابته کړي چې د جاغوریو او مالستان جګړه په نورو سیمو کې له شویو جګړو سره توپیر ولري.
د چارو شنونکی اول خان احمدزی هم وايي چې په هېواد کې روانه جګړه د افغانانو پر ضد ده او د افغانستان دښمنان د دې جګړې د دوام لارې چارې لټوي.
احمدزی وايي چې د جګړې دوام د افغانانو په خير نه دی او په وينا يې، هغوی چې د مالستان او جاغوريو جګړو ته قومي رنګ ورکوي، په حقيقت کې د افغانستان له دښمنانو سره د جګړې په اوږدولو کې مرسته کوي. نوموړی وړانديز کوي چې حکومت دې هم د هغو کسانو پر وړاندې اقدامات وکړي چې له وضعيته د افغانانو د وېشلو لپاره کار اخلي.
