د پوهنې وزارت پرېکړه کړې چې د هېواد د پوهنې په سيسټم کې به د مېرمنو د ونډې د ډېرولو لپاره تر ۱۴۰۰ لمریز کال پورې ۳۰ زره ښځينه ښوونکې استخدام کړي.
د پوهنې وزارت وياندې نوريې نزهت پرون په کابل کې يوه خبري کنفرانس ته وويل، د دغه پلان په پلي کېدو سره به زده کړو ته د نجونو لاسرسی پراخ شي او دغه راز به د ښوونکو په توګه د ګومارل کېدو له لارې د مېرمنو اقتصادي وضعيت ښه شي.
نزهت وويل چې تېر کال یې په ټول هېواد کې ۲۶۷۴ قراردادي ښوونکي او سږ کال يې بيا ۲۳۲۶ قراردادي ښوونکي درلودل. نوموړې زياته کړه چې ۳۰ زره نورې قراردادي ښوونکې به د هېواد د ۳۴ ولايتونو په هغو کليوالو سيمو کې پر دندو وګومارل شي چې ښځينه ښوونکې پکې کمې دي او يا بېخي نشته.
د پوهنې وزارت وياندې وويل: «د دغه پروګرام په عملي کېدو سره به د پوهنې په سيسټم کې د ښوونکو په توګه د مېرمنو ونډه له ۳۳ څخه ۴۲ سلنې ته لوړه شي. دغه راز به په کليوالو سيمو کې چې خلک يې د دودونو تر سيوري لاندې ژوند کوي، زده کړو ته د نجونو لاسرسی هم پراخ شي.»
د نوريې نزهت په خبره، د پوهنې وزارت په مديريتي پوسټونو کې هم د مېرمنو د ونډې د ډېرولو هڅې روانې دي چې په وينا يې اوس د دغه وزارت ۲۰ رياستونه مېرمنو ته ځانګړي شوي دي. دې زياته کړه چې په ولايتونو کې د ښوونکو د روزنې د رياستونو اړوند، يوولس دويم بستونه د ازادې سيالۍ له لارې اعلان ته سپارل شوي او ډېر ژر به د مرکز ورته بستونه هم اعلان کړي.
نزهت وويل، د پوهنې په سيسټم کې د مېرمنو د ونډې ډېرول د دغه وزارت د ستراتېژيک پلان يوه برخه ده چې دوی به يې د پلي کولو له لارې د پوهنې د کيفيت د لوړولو او زده کړو ته د ښځو د لاسرسي په پراخولو کې هڅه وکړي.
