د ننګرهار سيمه ييزو چارواکو ويلي، د دغه ولايت په خوږياڼو ولسوالۍ کې د عملياتو پر مهال د وسله والو طالبانو د سرې قطعې مرکزونه په نښه شوي او ۳۰ وسله وال مخالفین پکې وژل شوي دي.
د چارواکو په وينا، عمليات د ملي امنيت ځانګړو ځواکونو کړي او په وژل شويو کسانو کې د يو شمېر ډلمشرانو په ګډون د سرې قطعې قوماندان هم شامل دی.
د ننګرهار د والي وياند عطاءالله خوږياڼی وايي چې د ۰۲ قعطې په نوم د ملي امنيت ځانګړو ځواکونو وړمه شپه د خوږياڼو ولسوالۍ اړوند په زاوې سيمه کې د طالبانو د سرې قطعې د وسله والو پر مرکزونو عمليات ترسره کړي دي.
هغه وايي، په عملياتو کې د يادې قطعې پنځه فعال مرکزونه په بشپړ ډول وران شوي او ۳۰ وسله وال پکې وژل شوي دي.
خوږياڼی زياتوي، په وژل شوو کې څو تنه يې د دې ډلې سرګروپان دي او د مخبيت په نوم د یادې قطعې قوماندان هم پکې شامل دی.
د نوموړي د معلوماتو له مخې، د دغو عملیاتو په ترڅ کې راکټ، پیکا، لاسي بمونه، کلاشینکوفونه، موټرسایکل او نور مهمات د امنیتي ځواکونو لاس ته ورغلي دي.
هغه زياته کړه چې وژل شوي طالبان ډېری د هلمند، لوګر، کندهار او یو شمېر نورو ولایتونو اوسېدونکي وو او په عملیاتو کې ملکي وګړو او امنیتي ځواکونو ته کوم زیان نه دی اوښتی.
بلخوا د وسله والو طالبانو وياند ذبيح الله مجاهد ويلي، امنيتي ځواکونو د دوی هغه وسله وال په نښه کړي چې په سيمه کې د داعش وسله والو پر ضد جنګېدل.
نوموړي د ۱۶ ځانګړو ځواکونو د وژلو پر ادعا سربېره د خپلو دريو ملګرو د وژل کېدو او دريو نورو د ټپي کېدو خبره هم تاييد کړې ده.
د يو بل خبر له مخې، په ختيځ کې د ۲۰۱ سېلاب قول اردو چارواکي وايي چې د ننګرهار په هسکه مېنه او نازيانو ولسواليو کې د داعش وسله والو پر ضد پيل شويو عملياتو کې يو شمېر سيمې له دغو وسله والو نيول شوې دي.
د دې قول اردو وياند جګړن محمد هارون يوسفزي ويلي چې د نازيانو ولسوالۍ د لعل منډي او د هسکې مېنې ولسوالۍ د اوغز سيمې اړوند يو شمېر کلي له وسله والو پاک شوي او امنيتي ځواکونه پکې ځای پر ځای شوي دي.
داعش وسله والو لا تر اوسه بيا په دې اړه غبرګون نه دی ښودلی.
