د اجرائیه ریاست دويم مرستیال محمد محقق ويلي چې د افغانستان د سولې لپاره د امريکا د بهرنيو چارو وزارت استازي زلمي خليلزاد د زابل ولايت په خاک افغان ولسوالۍ کې د طالبانو د پخواني مشر ملا عمر له زوی ملا يعقوب سره کتلي دي.
محقق له امريکا غږ سره په خبرو کې ويلي چې د سولې د هڅو په تېزېدو سره پر هزاره مېشتو سيمو د طالبانو بريدونه هم پيل شوي دي.
د محقق دا ادعا په خپلواکه توګه نه ده تاييد شوې او نه هم امريکايي چارواکو په دې تړاو څه ويلي دي.
محقق زیاته کړې: “د سولې خبرو له پیلېدو سره یو ځای په کور دننه او بهر پټو او ښکاره ناستو سره سم پر هزاره مېشتو سیمو کې جګړې زیاتې شوې، دا سیمې له څو کلونو راهيسې ارامې وې او هېڅ حمله نه وه شوې، خو د سولې خبرو په تېزېدو سره هلته جګړې زیاتې شوې دي».
نوموړی وايي، د سولې له خبرو ملاتړ کوي، خو وايي، دغه خبرې باید یو جانبه نه وي. ده ګيله کړې چې د افغان سولې لپاره د امريکا د بهرنيو چارو وزارت استازي هزاره مشرانو ته د ملاقات وخت نه دی ورکړی.
محمد محقق دغه څرګندونې داسې مهال کوي چې د پنجشنبې په ورځ د سولې عالي شورا یوې مرستیالې مېرمن حبیبه سرابي هم د سولې د وروستیو هڅو په اړه د اندېښنې په ښودلو سره ویلي چې د افغان سولې په اړه وروستیو هڅو کې د سولې عالي شورا څنډې ته شوې ده.
هغې ویلي وو: «زه په واضح توګه درته وایم چې فعلاً د سولې پروسه د سولې د عالي شورا له لاس څخه وتلې ده، ژنیو کنفرانس ته هم د سولې عالي شورا غړي نه دي غوښتل شوي».
زلمی خلیلزاد د خپل دويم سفر په ترڅ کې تېره اونۍ افغانستان ته راغلی و او پر افغان چارواکو سربېره یې له یو شمېر سیاسي او جهادي مشرانو سره هم وکتل.
نوي راپورونه وايي چې خليلزاد په قطر کې له طالب استازو سره هم کتلي او د افغان سولې په تړاو يې ورسره خبرې کړې دي.
