لوړپوړی امریکايي جنرال: طالبان له نظامي لارو د ماتې وړ نه دي

د امریکا د پوځ د مرکزي قومندانۍ قومندان جنرال جوزف دانفورډ په یوه ناسته کې د خبرو پر مهال ویلي چې طالبان له نظامي لارو د ماتې وړ نه دي. دده په خبره په افغانستان کې اوولس کلنې جګړې وښوده، چې له بدمرغه د طالبانو په ماتولو کې نظامي لاره ګټوره نه ده او باید پر بديلو لارو فکر وشي. نوموړي همدا راز ویلي چې طالبان هم د جګړو له لارې خپلو موخو ته نه شي رسېدلی نو ښه به وي چې پر سیاسي مذاکراتو تر هر څه ډېر تمرکز وشي. هغه ویلي امریکا او په ناټو کې ددوی ملاتړي اوس هڅه کوي چې د نظامي، سیاسي او مالي فشارونو پر مټ طالبان د سولې او سیاسي مذاکراتو مېز ته راولي. ډانفورډ ویلي ټول په دې باوري دي چې د افغانستان جګړه له نظامي لارو نه بلکې له سیاسي لارو د حل وړ ده. دغه امریکايي جنرال داسې مهال یادې څرګندونې کړې چې همدا اوس د امریکا د بهرنیو چارو وزارت ځانګړی استازی زلمی خلیلزاد د افغان سولې په برخه کې په سفرونو او هڅو بوخت دی. ډېری افغانان د امریکا وروستیو اقداماتو سولې ته هیله من کړي دي.