حامد کرزی: سولې د ته رسېدو لپاره د خلیلزاد هڅې هیله بښونکې دي

د هېواد پخواني ولسمشر حامد کرزي د افغان سولې لپاره د امریکا د ځانګړي استازې زلمي خلیلزاد هڅې سولې ته د رسېدو په برخه کې هیله بخښوونکې بللې دي. کرزي په قزاقستان کې له یوې ټلویزیوني شبکې سره په خبرو کې ویلي چې په افغانستان کې د وسله والو ډلو د فعالیتونو د پراخېدو لامل د امریکا د ناسمو سیاستونو پایله ده. هغه ویلي چې په افغانستان کې له اوولس کلنې جګړې وروسته لا هم وسله والې ډلې نه یواځې دا چې ختمې شوې نه دي بلکې په دې وروستیو کې یې فعالیتونو لا پراخ شوي دي. کرزي دغه راز یو ځل بیا په افغانستان کې د امریکا د نظامي فعالیتونو مخالفت کړی دی او ویلي یې دي څو پورې چې په بهر کې د وسله والو ډلو پټنځایونه له منځه لاړ نه شي په افغانستان کې وضعیت نه شي عادي کېدای. نوموړي په دې وروستیو کې په افغانستان کې د سولې لپاره د امریکا هلو ځلو ته په اشارې ویلي، د افغان سولې لپاره د خلیلزاد هڅې هیله بخښوونکې دي. دا په داسې حال کې ده چې زلمي خلیلزاد په قطر کې له وسله والو طالبانو سره تر لیدنې وروسته ویلي په افغانستان کې سولې ته هیلې ډیرې شوې دي.