د ټاکنو خپلواک کمېسیون وايي، تر راتلونکو شپږو ورځو به ولسي جرګې ته د ۳۲ ولایتونو د بریالیو نوماندانو ابتدایي نوملړ اعلان شي.
د دغه کمېسیون مرستیال ویاند ذبیح الله سادات د یکشنبې په ورځ له ازادي راډیو سره په خبرو کې وویل، سره له دې چې د لیندۍ دویمه یې د یادو پایلو د اعلان ورځ ټاکلې، خو ټینګار کوي چې که دقت د سرعت قرباني کېږي، نو د پایلو په اعلان کې به ځنډ ته ترجیع ورکړي.
نوموړي زیاته کړه: «د همدې اونۍ تر پایه به انشاالله د بیا شمېرنې پروسه ختمه شي، تر اوسه د دوو سوو مرکزونو رایې بیا شمېرل شوې، زموږ نهایي هڅه همدا ده چې د ۳۲ ولایتونو د لومړیو انتخاباتو پایلې د قوس په دویمه، د کابل د قوس په لسمه او نهایي پایلې به یوه میاشت وروسته اعلان کړو».
نوموړی وایي، تر اوسه د ۳۲ ولایتونو د بایو مېټریک دستګاوو معلومات د اطلاعاتو بانک ته اضافه شوي او هڅه کوي چې د کابل ولایت د مرکزونو د رایو د بیا شمېرنې پروسه هم ختمه او ډېتابېس ته یې شامل کړي.
د ټاکنو خپلواک کمېسیون مخکې ویلي وو، سره له دې چې د رایو بیا شمېرنه وخت نیسي، خو ممکن د لومړیو پایلو پر اعلان اغېز وکړي.
وروسته تر دې چې د ولسي جرګې په ټاکنو کې د تقلب او لاسوهنې په تړاو تند غبرګونونه راوپارېدل، د ټاکنو خپلواک کمېسیون اړ شو چې د هغو مرکزونو په تړاو چې په اړه یې شکایتونه موجود وو، د رایو د بیا شمېرنې پرېکړې وکړي. اوس دا کمېسیون شپږ ورځې وخت لري چې د رایو د بیا شمېرنې پروسه هم پای ته ورسوي.
پر ټاکنو د څار یو شمېر بنسټونه پر دې باور دي چې د ټاکنو خپلواک کمېسیون نه شي کولای په ټاکل شوې نېټه لومړنۍ پایلې اعلان کړي.
د افغانستان د ازادو او عادلانه ټاکنو بنسټ یا فیفا اجرایوي رییس یوسف رشید وایي، ټاکنیزو کمېسیونونو تر دې مهاله ونه شو کړای چې خلکو ته قناعت ورکړي.
رشید وایي، دوی ته په بغلان کې د رایو د بیا شمېرنې پروسې د توقف خبرونه ورسېدلي او دا ښيې چې د ټاکنو کمېسیون د دې پروسې د شفافیت تکل نه لري.
