پخواني ولسمشر حامد کرزي د افغان سولې لپاره د امریکا د ځانګړي استازي زلمي خلیلزاد هڅې سولې ته د رسېدو په برخه کې هیله بښونکې بللې دي. ایسنا خبري اژانس د پخواني ولسمشر حامد کرزي له قوله ویلي چې په افغانستان کې د وسله والو ډلو د فعالیتونو د پراخېدو لامل د امریکا د ناسمو سیاستونو پایله ده. هغه ویلي چې په افغانستان کې له ۱۷ کلنې جګړې وروسته لا هم وسله والې ډلې نه یوازې دا چې ختمې شوې نه دي، بلکې په دې وروستیو کې یې فعالیتونه لا پراخ شوي دي.
کرزي دغه راز یو ځل بیا په افغانستان کې د امریکا د نظامي فعالیتونو مخالفت کړی دی او ویلي یې دي تر څو چې له هېواده بهر د وسله والو ډلو پټنځایونه له منځه لاړ نه شي، په افغانستان کې وضعیت نه شي عادي کېدای. نوموړي په دې وروستیو کې په افغانستان کې د سولې لپاره د امریکا هلو ځلو ته په اشارې سره ویلي، د افغان سولې لپاره د خلیلزاد هڅې هیله بښونکې دي.
دا په داسې حال کې ده چې د افغان سولې لپاره د امریکا ځانګړي استازي زلمي خلیلزاد په قطر کې له وسله والو طالبانو سره تر لیدنې وروسته ویلي چې په افغانستان کې سولې ته هیلې تر بل هر وخت ډېرې شوې دي.
