د مشرانو جرګې غړي او اداري پلاوی ټینګار کوي چې حکومت دې ژر تر ژره د کندهار د وژل شوي امنیه قوماندان جنرال رازق د وژل کېدو په اړه څېړنې بشپړې او له ملت سره یې دې شریکې کړي.
دوی له حکومت او په تېره بیا له امنیتي او کشفي ارګانونو وغوښتل چې د کندهار د وژل شوي امنیه قوماندان عبدالرازق د وژل کېدو په اړه دې د څېړنو پایلې له دوی سره شریکې کړي.
دې جرګې د یکشنبې ورځې په عمومي غونډه کې وویل، حکومت او امنیتي ارګانونو ورسره د عبدالرازق له وژل کېدو وروسته ژمنه کړې چې په دوو اونیو کې به د دې پېښې څرنګوالی پیدا او پر وړاندې به یې جدي اقدامات وکړي.
د دې جرګې مشر فضل هادي مسلمیار د جرګې د یوشمېر غړو له څرګندونو وروسته وویل چې حکومت او امنیتي ارګانونه باید د کندهار د ترور شوي امنیه قوماندان د پېښې په اړه له بې پروايۍ ډډه وکړي.
نوموړي وویل: «د شهید جنرال صاحب رازق خان د شهادت په اړه د ټول ملت ملاحظه ده او په ګډه سره به يې تعقیبوو، په را روانه اونۍ کې به د امنیتي سکټور مشران او مسوولین د مشرانو جرګې ته تشریف راوړي».
د مشرانو جرګې غړو دغه راز وویل، کله چې د مشرانو جرګې یو څېړونکی پلاوی کندهار ته تللی و، امنیتي بنسټونو ورته ډاډ ورکړی و چې پېښه به په لږو ورځو کې وڅېړي، خو د دغو بنسټونو له کمزورو اقداماتو ښکاري چې پېښه یې هېره کړې ده.
د کندهار ولایت امنیه قوماندان عبدالرازق د ولسي جرګې له ټاکنو دوې ورځې وړاندې د میزان په ۲۶ مه د کندهار د ولایتي غونډو په خونه کې په داسې حال کې چې د بهرنیو ځواکونو یوشمېر لوړپوړي چارواکي هم پکې حاضر وو، د یوه افغان ساتونکي په ډزو ووژل شو.
د امنیتي چارو پوهان وايي، په وروستیو شاوخوا اوولسو کلونو کې د هېواد ډېری مهم امنیتي او ملکي کسان د وسله والو مخالفینو او یا د ناپېژاندو وسله والو له خوا وژل شوي او سره له دې چې امنیتي او کشفي ارګانونو یې د عاملینو د موندلو او جزا ورکولو هوډ کړی، خو تراوسه یې د یوې ترورېستې پېښې عاملین هم نه دي نیولي.
د دغو پوهانو له ډلې محمداګل مجاهد ازادي راډیو ته وویل: «پرته له شکه په اوولسو کلونو کې چې کومې قضیې په افغانستان کې شوې، د حکومت له خوا یا په دقیقه توګه نه دي څېړل شوې او که څېړل شوې هم دي، له خلکو سره یې شریکې کړې نه دي، که د دوی په کارونو کې نیمګړتیا وي او پکې پاتې راغلي وي، له اخلاقي پلوه بیا هم ضروري ده چې له خلکو سره یې شریکې کړي».
