د سولې عالي شورا وايي، باید پوه شو چې له وسله والو طالبانو سره سوله په کومه بیه تمامېږي. د دې شورا مرستیالې حبیبې سرابي ازادي راډیو ته وویل چې د افغانستان د سولې لپاره د امریکا د بهرنیو چارو وزارت ځانګړي استازي، زلمي خلیلزاد ډاډ ورکړی چې په قطر کې د طالبانو د سیاسي دفتر له استازو سره د خپلو خبرو جزیات به ورسره شریک کړي.
تر دې مخکې د سولې عالي شورا ویلي وو چې زلمي خلیلزاد د سولې لپاره له روانو هڅو دوی څنډې ته کړي دي، خو د دې شورا مرستیالې حبیبې سرابي وویل چې زلمي خلیلزاد له دوی سره د کتنې ډاډ ورکړی دی.
نوموړې زیاته کړه: « هغه څه چې موږ ته مهم دي دا دي چې کومې خبرې چې په قطر یا بل هرځای کې کېږي، باید د سولې له عالي شورا سره مطرح شي، موږ ته د خلیلزاد له لوري پیغام را رسېدلی چې له موږ سره به پر هغو موضوعاتو چې په دوحه کې یې خبرې ورسره کړې، بحث وکړي. موږ به له خلیلزاد سره مخامخ وګورو او خبرې به ورسره وکړو».
سرابي وايي، داسې رپوټونه ور رسېدلي چې خلیلزاد او د طالبانو د سیاسي دفتر استازو له افغانستانه د بهرنیو ځواکونو د وتلو په اړه جوړجاړی کړی دی.
خو هغې ټینګار وکړ چې له خلیلزاد سره په کتنه کې به دا پوښتنه وکړي او خپلې اندېښنې به له هغه سره شریکې کړي.
نوموړې زیاته کړه: «د یوې ښځې په توګه او د افغانستان د یوه وګړي په حیث زه غواړم چې په افغانستان کې د سولې په بیه وپوهېږم، موږ باید وپوهېږو چې په کوم قېمت سوله کوو؟ په افغانستان کې د سولې لپاره کوم ارزښتونه په پام کې نیول شوي دي؟ پر دې پوهېدل زموږ لپاره اهمیت لري».
