د راپورونو له مخې سپینې ماڼۍ په دې وروستیو کې سي ای اې او نورو ارګانونو ته دنده سپارلې چې له افغانستان څخه د خپلو ځواکونو د وتلو او له طالبانو سره د جوړجاړي لپاره په رسنیو کې تبلیغات وکړي او عامه ذهنیت دغه کار ته تیار کړي.
په داسې حال کې چې په دې وروستیو کې د امریکا متحده ایالتونو د سولې او خبرو اترو له لارې هڅې پیل کړې چې په افغانستان کې د دغه هېواد په تاریخ کې تر ټولې اوږدې جګړې ته د پای ټکی کېږدي. له دې سره هممهاله امریکايي رسنۍ او چارواکي بیا بیا وايې چې امریکا په افغانستان کې د ماتې په اړه د خبرونو د خپرولو له لارې غواړي د ځواکونو ایستلو او سولې ته ذهنیت برابر کړي.
د امریکا د دفاع وزارت پخواني مرستیال بينګ ویسټ ویلي، امریکا په افغانستان کې ماتې خوړلې او دغه هېواد باید تر دې حده ونه رسېږي، څو د سفارت له بامه په الوتکه کې را وتښتي، نو غوره ده چې له افغانستانه د وتلو لپاره ابرومندانه لارې چارې ولټوي.
ویسټ ویلي چې په افغانستان کې د زرګونو امریکایي سرتېرو له وژل کېدو او میلیونونه ډالرو له مصرف وروسته باید امریکا هڅه وکړي، څو د خپلې ابرو ساتلو لپاره له افغانستانه پښې سپکې کړي. هغه ویلي، امریکایي چارواکي باید داسې لاره غوره کړي، څو یو ځل بیا د ویتنام له برخلیک سره مخ نه شي.
امریکایې چارواکو هم په وار وار په دې اعتراف کړی چې د افغانستان جګړه له نظامي لارو نه شي ګټلی، نو له همدې کبله غواړي چې دې جګړې ته سیاسي حللاره ومومي. د امریکا د پوځ د مرکزي قوماندانۍ قوماندان جنرال جوزف ډانفورډ ویلي چې طالبان له نظامي لارو د ماتې وړ نه دي. د ده په خبره په افغانستان کې اوولس کلنې جګړې وښوده چې له بده مرغه د طالبانو په ماتولو کې نظامي لاره ګټوره نه ده او باید پر بديلو لارو فکر وشي. نوموړي همدا راز ویلي چې طالبان هم د جګړو له لارې خپلو موخو ته نه شي رسېدلی، نو ښه به وي چې پر سیاسي مذاکراتو تر هر څه ډېر تمرکز وشي. هغه ویلي، امریکا او ملاتړي یې هڅه کوي چې د نظامي، سیاسي او مالي فشارونو پر مټ طالبان د سولې او سیاسي مذاکراتو مېز ته راولي.
د سیاسي چارو شنونکي وايي، داسې ښکاري چې دا په امریکا کې دننه او په نړیواله کچه د دې لپاره ذهنیت سازي ده چې امریکايي ځواکونه له افغانستان څخه و ایستل شي.
