په دې ورځو کې په کابل او ځینو ولایتونو کې یو ځل بیا د جمهوریت د ملاتړ تر نامه لاندې د حکومت په ملاتړ غونډې جوړېږي. په دې غونډو کې چې د حکومتي چارواکو او د حکومت د سیاسي ملاتړو لخوا جوړېږي، د سولې په پروسه کې د حکومت د دریځ ملاتړ کېږي. ډېری داسې غونډو ته مخامخ حکومتي چارواکي هم ورځي او ویناوې پکې کوي. ویل کېږي چې دا غونډې د حکومت په مالي لګښت جوړېږي، خو معلومه نه ده چې پیسې یې د حکومت کومه اداره او د کوم پروسیجر له مخې ورکوي.
د جمهوریت ملاتړ او یا هم د بل سیاسي فکر لرل او د دې لپاره غونډه او یا بل قانوني فعالیت هېڅ ډول ستونزه نه لري او دا د هر افغان حق دی. خو په دې وروستیو کې چې کومې غونډې جوړېږي، په اړه یې جدي پوښتنې او اندېښنې شته. لومړۍ پوښتنه دا ده چې ولې حکومت او جمهوریت سره ګډ شي!؟ له بده مرغه دا غونډې د جمهوریت د ملاتړ په نوم له حکومت او بیا په ځانګړي ډول له یوه کوچني واکمن ټیم څخه ملاتړ دی. دویمه ستونزه د دې غونډو مالي لګښت دی. ولې باید حکومت د داسې غونډو لګښت ورکړي؟ دا لګښت له کومه کېږي او د حکومت کومه اداره، د کوم قانون پر اساس حق لري چې د افغانستان د خلکو مالیه او نوره حکومتي بودیجه په داسې غونډو ولګوي!؟ درېیمه ستونزه دا ده څوک چې خپله جمهوریت مسخره کړي، تر پښو لاندې یې کړي او هر کار یې د جمهوریت مخالف وي، څنګه د جمهوریت غږ پورته کولی شي؟!
تر دې مهمه او اساسي خبره دا ده چې جمهوریت یوازې چیغې او نمایشي کارونه نه دي؛ بلکې یو عمل دی. حکومتي چارواکي د دې پر ځای چې له جمهوریت څخه د ملاتړ غونډې جوړې کړي او لویه دولتي بودیجه پرې ولګوي، غوره ده چې په خپلو کارونو سره جمهوریت تمثیل کړي، دوی باید وښيي چې خپله د جمهوریت ارزښتونو ته ژمن دي او خلک، د خلکو اراده، غوښتنې او ارزښتونه ورته مهم دي.
له بده مرغه حکومتي چارواکي په داسې حال کې نمایشي کارونه کوي او دولتي بودیجه پرې لګوي چې خلک له سختو ستونزو سره مخ دي، په حکومت کې فساد په خلکو خولې لګوي، د ارګ په شاوخوا کې سړکونه کنډوکپر دي، د کابل ښار په دولتي ښوونځیو کې د زرګونو ښوونکو کمی دی او سلګونه زره شاګردان بې ښوونکو دي، د ډېرو ادارو قراردادي کارکوونکو په میاشتو میاشتو معاش نه دی اخیستی، د لوږې کچه په بې ساري ډول ډېره شوې ده، بې کارۍ غوغا جوړه کړې او ستونزې خورا ډېرې دي. په همدې وخت کې حکومتي چارواکي د جمهوریت نندارې وړاندې کوي، دولتي بودیجه پرې لګوي، د سولې پر وړاندې خنډونه جوړوي او عامه ذهنیتونه خرابوي.
حکومتي چارواکو ته پکار ده چې نور د خلکو په سترګو کې د خاورو شیندل پرېږدي. جمهوریت د خلکو نظام دی، که یې خلک غواړي، نو خپله به ترې دفاع کوي او په دې اړه د حکومت هڅو او پیسو ته اړتیا نشته. چارواکي باید خپلو اصلي دندو ته پام وکړي، د خلکو جمهوري حقونه ورکړي او ستونزې حل کړي. د سولې د تخریب لپاره نمایشي کارونه به د ارګ واکمن پیاوړي نه کړي؛ بلکې لا به یې له پښو وغورځوي. له همدې امله نور باید دا ننداره ودرول شي.
