د امریکا سفیر: د افغان سولې لپاره به د زلمي خلیلزاد ماموریت بریالی شي

په کابل کې د امریکا سفیر جان باس ویلي زلمی خلیلزاد به د افغان جګړې په پای ته رسولو کې بریالی شي، ځکه هغه د سیمې او په دغه سیمه کې له لسیزو راهیسې د روانو حالاتو په اړه ښه درک او پوهه لري. جان باس همدا راز ویلي چې که د افغانستان ګاونډي هېوادونه همکاري وکړي نو د افغان سولې پروسه به چټکه شي. دده په وینا ګاونډي هېوادونه باید همدا راز امریکا ته ډاډ ورکړي چې په افغانستان کې د ترهګرو ډلو ملاتړ نه کوي، دوی ته پټنځایونه نه ورکوي او دغه ډلې له خپلې خاورې وباسي. هغه ویلي پاکستان، ایران او د منځنۍ اسیا هېوادونه د افغانستان د سولې په برخه کې مهم رول لوبولی شي. جان باس وویل له افغان ځواکونو د امریکا او ناټو ملاتړ دوام لري خو تر څنګ یې دا یو مهم هدف دی چې وسله وال طالبان سولې ته غاړه کېږدي او روانه کورنۍ جګړه په افغانستان کې پای ته ورسيږي.