حضرت عمر زاخېلوال: جګړه بهرنیانو پیل کړې، ختمول یې هم ددوی په لاس کې دي

افغان جګړه بهرنی اړخ لري او د بهرنیانو له همکارۍ پرته نه شي ختمېدلی. په پاکستان کې افغان سفیر د ځینو سیاسي څېرو پر هغه نیوکو غبرګون ښودلی چې ویلي یې وو، د افغان سولې لپاره امریکایی استازی زلمی خلیلزاد د سولې ټولې چارې پرمخ وړي. عمر زاخېلوال ویلي د افغانستان جګړه بهرنی اړخ لري، ددغه جګړې وسله وال ترهګر د بهرنیانو له لوري تمویل کېږي، بهرني هېوادونه په خپلو مرکزونو کې د افغان جګړې ښکېلو وسله والو ته د روزنې زمینه برابروي نو سوله هم د بهرنیانو په همکارۍ راتللی شي. دده په خبره امریکا د افغان جګړې مهم ښکېل لوری دی او تر هغه چې دوی له طالبانو سره یوې پایلې ته ونه رسېږي، نو په دې جګړه کې به د افغان انسان وینې همداسې تویېږي. دده په وینا پر افغانانو تل د پردیو جګړه تپل شوې ده او اوس ددې وخت دی چې دغه جګړه پای ته ورسول شي. نوموړي ویلي چې امریکا یوازې د افغانانو په مشرۍ او مالکیت افغان سولې ته زمینه برابروي او پاتې خبرې به د افغان حکومت او طالبانو ترمنځ ترسره کېږي.