عبیدالله بارکزی: یوازې پردي جاسوسان د سولې د هڅو مخالفت کوي

د ولسي جرګې ګڼو غړو نن د سولې په برخه کې د زلمي خلیلزاد له هڅو ملاتړ وکړ. یو محدود شمېر وکیلانو نن د ولسي جرګې په امتیازي ساعت کې د خبرو پر مهال وویل، چې زلمی خلیلزاد پخپل سره لګیا دی او د افغان سولې لپاره خپلسری کار کوي. د وکیلانو په خبره دوی افغان حکومت ته صلاحیت نه ورکوي. خو ډېر شمېر وکیلانو بیا د زلمي خلیلزاد له هڅو ملاتړ وکړ او هغه یې د افغانستان په ګټه وبللې. د ولسي جرګې غړي عبیدالله بارکزي وویل، یوازې لږ سلنه هغه کسان چې د پردیو جاسوسان دي او د پردیو لپاره کار کوي د سولې له هر ډول هڅو سره مخالفت کوي. دده په خبره سوله د افغانانو حق دی، د افغانانو هیله ده او ټول افغانان غواړي چې په سوله کې ژوند وکړي. بارکزي ټینګار وکړ، چې یوازې پردي جاسوسان او د نورو هېوادونو د ګټو لپاره کارکوونکي کسان د سولې له هڅو سره مخالفت کوي. د ولسي جرګې ګڼو غړو همدا راز پر وسله والو طالبانو هم غږ وکړ، چې له جګړو لاس واخلي او په افغانستان کې د سولې، ثبات، پرمختګ او دایمي سوکالۍ لپاره کار واخلي.