خليلزاد اتمر ته : موقت حکومت اړوند مې چاسره خبر نه ده کړې، ټاکنې به پر خپل وخت وشي

د ولسمشرۍ احتمالي کانديد محمد حنیف اتمر د افغانستان د سولې په چارو کې د امریکا متحده ایالاتو د بهرنیو چارو وزارت له ځانګړي سلاکار ښاغلي زلمي خلیلزاد سره وکتل.  د اتمر د مطبوعاتي دفتر د خبر پاڼې د خبر له مخې په دې لیدنه کې د افغانستان د سولې او پخلاینې بهیر په بیلابیلو برخو هر اړخیز بحثونه وشول. ښاغلي اتمر د افغانستان په روان سیاسي، امنیتي او په ځانګړي توګه د سولې او مذاکراتو د بهیر او ولسمشریزو ټاکنو په اړه خپل نظر او وړاندیزونه شریک کړل. په دې لیدنه کې ښاغلي خلیلزاد وویل، چې د سولې خبرې او مذاکرات به د افغانانو په مشرۍ پر مخ وړل کیږي او د امریکا متحده ایالات د افغانانو په مشرۍ د سولې له بهیر څخه ملاتړ کوي. ښاغلي خلیلزاد همدارنګه زياته کړه، چې له هیڅ لوري سره یې له ټاکنو وړاندې د لنډمهالي ادارې پر رامنځته کیدو بحث نه دی کړی او په خپل وخت یې د ولسواکو ټاکنو له تر سره کیدو ملاتړ و کړ.