سولې شورا: که د خلیلزاد هڅې جدي تعقیب شي تر ټاکنو مخکې سوله ممکنه ده

د سولې عالي شورا وایي، د افغان سولې په اړه چې کومه هیله مندي خلیلزاد څرګنده کړې، که په جدي توګه تعقیب شي، له واقعیته لرې نه ده. د سولې شورا وروسته له هغه دا څرګندونې کوي چې د افغان سولې لپاره د امریکا ځانګړي استازي زلمي خلیلزاد وویل، له طالبانو سره له خبرو وروسته ورته جوته شوې چې د افغان جګړې ښکېلې غاړې سوله غواړي او ښایي تر راتلونکو ولسمشریزو تاکنو مخکې سولې ته ورسېږي. د سولې شورا مرستیال حاجي دین محمد وایي، که د افغانستان د ستونزې حل په جدي توګه تعقیب شي، شک نه شته چې د خلیلزاد له تمې سره سم حل شي. دین محمد زیاته کړې له یوې خوا د امریکا د حکومت ژوره پاملرنه او له بلې خوا د طالبانو هغه وینا چې دوی له امریکا سره مخامخ خبرې کوي، د دې ښکارندویي کوي چې نور په دې برخه کې کومه اساسي ستونزه پاتې نه ده، نو تمه شته چې دا هڅې به مثبتې پایلې ولري. نوموړي د یوې پوښتنې په ځواب کې وویل چې که د خلیلزاد هڅې په جدي توګه دوامداره شي نو تر ټاکنو مخکې د سولې هدف تر لاسه کېدلی شي.