د سولې په برخه کې پاشلې هڅې همغږي کولو ته اړتیا لري

افغان حکومت او امریکا ته په کار ده چې په سیمه کې د افغان سولې لپاره روانې هڅې سره همغږې کړي. د سولې په اړه د تحقیقاتو او مرستې یوه مرکز په یوه اوږده مطلب کې ویلي چې د مسکو کنفرانس سره له دې چې د سولې لپاره یو ښه ګام دی خو تر څنګ یې په سیمه کې ځينو شکونو او ستونزو ته هم لمن وهلې ده. په مطلب کې راځي د سیمې هېوادونه د افغانستان په مسئله کې ښکېل دي نو امریکا ته په کار ده، چې د سیمې له هېوادونو سره په مشوره او همکارۍ د افغانستان د سولې لپاره کار وکړي. سرچینه کاږي په سیمه کې داسې هېوادونه شته چې له طالبانو سره قوي سیاسي اړیکې لري او داسې موارد هم شته چې دغه ډلې ته پيسې او وسلې هم ورکوي. ددغه مرکز په لیکنه کې راغلي دي نو له دې حقایقو سترګې نه شي پټېدلی چې امریکا او یا افغان حکومت دې وکړی شي په یوازې ځان طالبان د سولې خبرو ته اړ باسي، ځکه طالبان په سیمه کې ملاتړي لري او دوی ته به اجازه ور نه کړي چې په اسانه د سولې له پروسې سره یو ځای شي. دغه مرکز امریکا ته سپارښتنه کوي، چې د ملګرو ملتونو په همکارۍ، د سیمې د هېوادونو په ملاتړ او سلا طالبان د سولې خبرو ته حاضرکړي او سیمه ییز ملاتړي یې ددغه ډلې له مادي او سیاسي ملاتړه را وګرځوي.