نشنل انټرسټ:  د افغانستان اقتصاد وده کوي خو تر دې وړاندې سولې ته اړتیا لري

نشنل انټرسټ په یوه اوږده مقاله کې لیکي چې افغانستان او ددغه هېواد ملاتړي د ژنیو کنفرانس ته تیاری نیسي. د سرچینې په وینا د افغانستان ملاتړي به له دغه هېواد سره د خپلو مالي همکاریو په اړه خبرې وکړي او په دې برخه کې به نوې ژمنې ترسره کړي. د نشریې په باور د نړیوال بانک وروستی راپور ښيي چې په افغانستان کې د سوداګرۍ په برخه کې شفافیت رامنځ ته شوی او په دې برخه کې د حکومت کارونه د پام وړ دي. همدا راز د پیسو نړیوال صندوق هم په یوه راپور کې ویلي چې په افغانستان کې د مالي چارو مدیریت تر پخوا په ښه حالت کې دی او په دې برخه کې ترسره شوې هڅې مثبتې دي. نشنل انټرسټ بیا لیکي چې افغانستان اقتصادي پرمختګ کولی شي، خو د ژنیو کنفرانس کې دې تر هر څه وړاندې د افغانستان پر سوله خبرې وشي. خو تر څنګ یې دا هم وایي چې وروستیو وچکالیو په افغانستان کې ستونزې ډېرې کړې دي، خلک مرستو ته اړتیا لري او ښايي مرسته کوونکي هېوادونه په دې برخه کې هم خپلې ژمنې ولري.