د کرونا د درېیمې څپې د مخنیوي په تړاو د حکومت پر بې پروایي له نیوکو وروسته د عامې روغتیا وزارت وايي چې یوه طرحه یې د حکومت له مشرانو سره شریکه کړې ده. د روغتیا وزارت سرپرست وحید مجروح ویلي چې د دغه ویروس د درېیمې څپې مخنیوي لپاره باید جدي اقدامات ترسره شي. هغه زیاته کړې چې دوی د ایران او پاکستان پولو ته څېرمه پر تګ راتګ بندیز، له هند سره د پروازونو قطع کېدل، د راټولېدنو مخنیوی او د اضطراري کمېټو فعالولو طرحه له حکومت سره شریکه کړې ده. هغه پر ولایتي رییسانو هم غږ کړی چې باید د دغه ویروس مخنیوي لپاره اړین اقدامات وکړي او ورته پوره چمتووالی ونیسي.
له بده مرغه ښکاري چې حکومتي چارواکي د نورو مسایلو تر څنګ د خلکو د روغتیا په اړه هم بې تفاوته دي او د خلکو روغتیايي حالت ورته مهم نه ښکاري. په داسې حال کې چې د افغانستان په ګاونډیو او نږدې هېوادونو کې د کرونا درېیمه وژونکې څپه روانه ده، د افغانستان حکومت لا هم په عملي ډول د دې څپې د مخنیوي لپاره هېڅ نه دي کړي. اوس چې ناوخته شوی هم ښکاري، د عامې روغتیا وزارت د یوه پلان خبره کوي، خو دا پلان لا هم عملي شوی نه دی او آن عملي کول یې پیل شوي هم نه دي. چارواکي وايي چې پلان یې د حکومت مشرانو ته سپارلی او د هغوی وروستۍ پرېکړې ته منتظر دي. له بده مرغه د حکومت مشران هم د واک پر خوندیتوب او نورو شخصي ګټو بوخت دي او د کرونا د دویمې څپې د مخنیوي لپاره هڅې او پلانونه ورته مهم نه دي. له همدې امله د کرونا درېیمه څپه په شدت سره د افغانستان د خلکو امنیت ګواښي.
داسې ښکاري چې د حکومت کړنې به د تېر په څېر بیا هم ناسمې او ناوخته وي. دوی به بیا هم د افغانستان د دننه کرنتین راولي چې دا چاره به خلک نور هم زیانمن کړي دي. د افغانستان غوندې په غریب هېواد کې کرنتین تر کرونا ډېر زیان اړوي؛ ځکه چې اقتصاد کمزوری دی او خلک اړ دي چې هره ورځ کار وکړي. حکومت هم په داسې حالت کې نه دی چې د خلکو ستونزې دې حل کړلی شي. له همدې امله کرنتین یوه ناکامه تجربه ده چې وېره ده حکومت به یې بیا هم وکاروي. د دې پر ځای چې ښارونه کرنتین شي او کاروبار په ټپه ودرول شي، ښه لاره دا ده چې د کرونا د درېیمې څپې د راتګ مخنیوی وشي. د راتګ د مخنیوي لپاره باید له هند، ایران او ټولو نورو هغو هېوادونو سره تګ راتګ بند شي چې د کرونا درېیمه څپه پکې خوره ده. که دا ممکنه نه وي چې دا پروازونه یو مخ بند شي، دا کار خو شونی دی چې له بهره راتلونکي کسان باید د کرونا ټېسټ ولري او یا هم افغانستان ته له راتګ سره سم باید کرونا ټېسټ وکړي او تر ممکنه بریده تر جدي څار لاندې ونیول شي.
اوس وېره ده چې د حکومت بې پروايي به د دې سبب شي چې درېیمه څپه افغانستان ته راشي او چارواکي به یې بیا دلته د مخنیوي لپاره ناکامې هڅې کوي، ښارونه به بندوي او خلک به له نورو سترو اقتصادي ستونزو او لوږې سره مخ کړي.
