سولې شورا: تر ولسمشرۍ ټاکنو مخکې طالبانو سره د سولې خبرې پیلېږي

د سولې عالي شورا وایي، په مسکو غونډه کې د طالبانو لخوا د سولې خبرو پیل لپاره اېښودل شوي شرطونه د سولې خبرو پر وړاندې خنډ نه دي او دا خبرې به تر راتلونکو ولسمشرۍ ټاکنو مخکې پیل شي. سپوټنیک د طلوع نیوز له قوله ویلي چې د یادې شورا مرستیال مولوی عطاالرحمن سلیم چې د مسکو غونډه کې یې هم ګډون کړی دی وایي، که څه هم دوی مخامخ له طالب استازي سره خبرې نه دي کړې خو په یاده غونډه کې د دوی له دریځه جوتېده چې ډېر نرم شوي او د هغوی لخوا اعلان شوي شرایط هم دومره سخت نه دي چې دا خبرې به بیرته په ټپه ودروي. نوموړي ویلي حتماً طالبان هم دا غواړي چې د راتلونکي حکومت برخه اوسي نو باید د سولې خبرې هم تر راتلونکو ټاکنو مخکې پیل شي. په ورته وخت کې د افغان سولې لپاره د امریکا ځانګړي استازي زلمي خلیلزاد هم د خپل دویم سفر تر پیل مخکې پر افغان حکومت او طالبانو غږ وکړ چې د سولې خبرو د پیل لپاره دې با صلاحیته پلاوی وټاکي. ولسمشر غني هم د سولې بورډ جوړولو په موخه په ارګ کې د ټولنې له بیلابېلو اقشارو سره لیدنې پیل کړې او ویل کېږي چې یاد بورډ به هم د روانې اوونۍ تر پایه بشپړ شي.