ولسمشر غني: موږ د خپل محبوب له سیرته ښه درس نه دی اخیستی

ولسمشر غني وایي، په هېواد کې د جګړې د دوام علت له نبوي سیرته درس نه اخیستل دي. نوموړي دغه راز زیاته کړه، د روزنې بڼه باید تر بیا کتنې لاندې ونیول شي. ولسمشر غني د حضرت محمد (ص) د میلاد ورځې په مناسبت مراسمو کې چې نن په ارګ جوړ شوي وو، وویل حضرت محمد (ص) په داسې مهال پر پیغمبرۍ مبعوث شو چې جګړې، جهل، نفاق او بې رحمیو د خلکو ژوند تریخ کړی و او خلک د ظالمانو له لاسه له ژونده په تنګ وو. نوموړي زیاته کړه، پیغمبر (ص) پوهېده چې د هغه ستر رسالت په ټولنه کې د سولې او امنیت راوستل، د خلکو په منځ کې د اخلاقي فضایلو تحقق او په ژوند کې د علم او مدنیت غوړول دي. د نوموړي په خبره اسلام د سولې او امن دین دی خو په هېواد کې روانو ناخوالو ته په پام دا جوتېږي چې موږ د خپل محبوب له سیرته ښه درس نه دی اخیستی. په دې ناسته کې علماوو هم ګډون درلود، په خبرو کې یې اسلام د سولې او دوستۍ دین وباله او د دولت له ټولو مخالفینو یې وغوښتل چې د سولې او ورورګلوۍ لاره خپله کړي.