د پنټاګون ځانګړی مفتش:  د افغانستان د سولې په برخه کې ډېر لږ پرمختګ ترسترګو کېږي

د امریکا ددفاع وزارت یا پنټاګون وایي درې میاشتې کېږي چې د افغانستان د سولې په برخه کې هڅې پيل شوې دي خو تر دې دمه په دې برخه کې لږ روښانه پرمختګ ترسترګو کېږي. د امریکا ددفاع وزارت ځانګړي مفتش ګالین اې فاین ویلي، له طالبانو سره خبرې او سیاسي مذاکرات د امریکا د تګلارې یوه مهمه برخه وه، خو په دې برخه کې ډېر کم کارونه ترسره شوي دي. نوموړي همدا راز ویلي چې په دې تګلاره کې دعامو خلکو د ژوندانه ښه کولو، ښې حکومتولۍ او ترهګرو د ځپلو په برخه کې په ګوته شوي موارد کمزوري دي او په افغانستان کې یې محسوس اغېز نه دی کړی. ګالین فاین له رسنیو سره په خبرو کې ویلي، امریکا ته په کار ده، چې د سولې په برخه کې خپله تګلاره بریالۍ کړي او په دې توګه په افغانستان کې د امریکا اوږده جګړه پای ته ورسول شي. هغه ویلي، چې پنټاګون د ټرمپ د تګلارې عملي کولو ته ژمن دی او هڅه به وکړي دغه تګلاره بریالۍ کړي.