حامد کرزی: دښمنان له هرې ممکنې لارې دلته د جګړې غځول غواړي

د افغانستان دښمنان له هرې ممکنې لارې په افغانستان کې د جګړې اوږدول غواړي. د پخواني ولسمشر حامد کرزي له دفتره په خپره شوې خبرپاڼه کې په کابل کې پرونۍ خونړۍ پېښه په کلکو ټکو غندل شوې ده. په خبرپاڼه کې راځي چې ترهګرو د دیني علماوو پر یوه لویه غونډه ځانمرګی برید وکړ او په دې توګه یې وښوده، چې د خپلو شومو موخو لپاره په هر وحشت لاس پورې کولی شي. حامد کرزي ویلي دغه ډول بریدونه ښيي چې د افغانستان دښمنان غواړي له هرې ممکنې لارې په افغانستان کې جګړه اوږده کړي. نوموړي یو ځل بیا پر نړیوالې ټولنې غږ کړی چې د ترهګرۍ پر وړاندې مبارزه کې جدي شي او په دې برخه کې رښتیني ګامونه اوچت کړي. دده په خبره پروني برید وښوده، چې ترهګر د خپلو موخو لپاره، هر قوم، هر مذهب او هر ډله په نښه کولی شي.