مخکښ امریکایي شنونکی: افغانستان د امریکایي سرتېرو په قبرستان بدل شوی

د امریکایي دولت یو پخوانی کارکوونکی او د پوځي چارو شنونکی رودڼي مارټینټ وایي، امریکا په افغانستان کې ناکامه ده او دا هېواد یو ځل بیا لکه د نورو امپراتوریو په څېر د بهرنیو سرتېرو په قبرستان بدل شوی دی. نوموړي په لاس انجلس له پریس ټلویزیون سره په مرکه کې ویلي، د افغانستان لپاره د امریکا نوې ستراتیژي ناکامه ده او دا هېواد د بهرنیانو په تېره بیا امریکایانو په قبرستان بدل شوی دی. هغه زیاته کړې، متحده ایالات دې له بریتانیا او شوروي زده کړه وکړي او دې حساسو شرایطو ته په پام دې په تدبیر ګام پورته کړي. هغه ویلي افغانستان له مودو راهیسي د لویو لویو امپراتوریو قبرستان بلل کېږي او پر دې هېواد یرغل کوونکي په ډېر ټیټ سر له یاد هېواده وتلي دي، نو امریکا ته په کار ده چې له هوښیارۍ کار واخلي او دا اوږده جګړه له سوله ییزو لارو پای ته ورسوي. نوموړي زیاته کړې افغان جګړه له پوځي لارو د ګټلو وړ نه ده، دا هر څه یواځې په کاغذ اسانه ښکاري خو په عمل کې د یوې داسې جګړې ګټل چې امریکا ورباندې په میلیاردونو ډالر ولګول اسانه کار نه دی. هغه په غزني کې د خپلو سرتېرو په وژل کېدو خواشيني څرګنده کړې او ویلي یې دي چې وسله والو پخوا لا خبرداری ورکړی و چې افغانستان به د امریکا لپاره د اتلسمې پېړۍ په قبرستان بدل کړي خو ټرمپ ونه منل او یاد هېواد ته یې نور سرتېري ولېږل چې د نوموړي په باور دا یو غیر معقول او غیر سنجېده اقدام و.