جواد ظریف: افغان ستونزه نظامي حل نه لري

د ایران د بهرنیو چارو وزیر محمد جواد ظریف له ژنیو غونډې وروسته پر خپل ټویټر لیکلي، په ژنیو ناسته کې پر دې ټینګار شوی دی چې د افغانستان اوږده کشاله له نظامي لارو د حل وړ نه ده او په دې هېواد کې د تاوتریخوالي یواځینی حل سیاسي ډیالوګ دی. هغه ویلي امریکا په زور افغان جګړه نه شي ګټلی نو ښه به وي د دې اوږدې جګړې پای ته رسولو لپاره له سیاسي ډیالوګه کار واخلي. نوموړي زیاته کړې ایران به د افغان سولې په برخه کې هیڅ راز هڅې ونه سپموي. ظریف ټینګار کړی چې د افغانستان ډیموکراټیک بریالیتوبونه باید د سولې قرباني نه شي او دې ټولو لاسته راوړنو ته پام باید له وسله والو طالبانو سره سیاسي جوړجاړی وشي او دا اوږده جګړه نور پای ومومي. دا په داسې حال کې ده چې د افغان سولې لپاره د امریکا ځانګړي استازي زلمي خلیلزاد ویلي، دوی د افغانستان د ۱۷ کلنې جګړې او په دغه هېواد کې د روان بحران د پای ته رسولو لپاره بېړه لري او په دې برخه کې یې هڅې ګړندۍ کړې دي.