آلیس ویلز: د سولې د خبرو پیل د طالبانو په مشرتابه پورې اړه لري

د جنوبي اسیا لپاره د امریکا د بهرنیو چارو وزارت استازې آلیس ویلز ویلي، افغان حکومت، افغانان او طالب جنګیالي سولې ته تیار دي او ټول سوله غواړي خو یوازې د طالبانو رهبري تر دې دمه سولې ته نه ده تیاره. د نوموړې په خبره د سولې د خبرو پیل د طالبانو په مشرتابه پورې اړه لري او ددې اړتیا ده، چې دوی ژر تر ژره د سولې د خبرو پیل ته تیاری ونیسي. ویلز زیاته کړې چې طالبانو ته د جګړې په ډګر کې ډېر تلفات اوښتي دي او ټول طالب جنګیالي سوله غواړي چې ښه ثبوت یې د څو میاشتو وړاندې اوربند و. د نوموړې په خبره طالب مشرانو ته هم په کار ده، چې ژر تر ژره د سولې لپاره تیاری ونیسي او له افغان حکومت سره مذاکرات پيل کړي. ویلز یادې څرګندونې داسې مهال کوي چې ولسمشر غني هم د جینوا په کفنرانس کې د سولې لپاره ۱۲ کسیز پلاوی وټاکه، خو طالبانو بیا د یوې اعلامیې په خپرولو سره وویل، له افغان حکومت سره خبرې نه کوي او ټول مذاکرات مخامخ له امریکا سره غواړي.