د سولې ولسي حرکت: د نوې تګلارې له مخې بیا د سولې هلې ځلې پیلوو

د سولې د ولسي حرکت غړي غواړي چې له کابله بېرته هلمند ته لاړ شي، خلکو ته د خپلو لاسته راوړنو په اړه معلومات ورکړي او د يو نوي طرزالعمل له مخې د سولې لپاره هلې ځلې پيل کړي. د هلمند ولايت په مرکز لښکرګاه کې يو شمېر ځوانان يو ځل بيا پر هغه ځاى را ټول شوي، له کوم ځاى نه چې نهه مياشتې وړاندې د سولې ولسي حرکت پيل شوى و. دغه ځوانان غواړي چې يو ځل بيا پر پخواني ځاى د سولې لپاره خېمه ودروي او د سولې لپاره نوې هلې ځلې پيل کړي. د يادونې ده چې د سولې د ولسي حرکت غړو د روان کال د غويي په مياشت کې له لښکرګاه څخه کابل ته پلى مزل وکړ چې په ٣٨ ورځو کې کابل ته ورسېدل. يادو کسانو په کابل کې د ځينو سفارتونو مخې ته خېمې و وهلې او له هغه وروسته بلخ ولايت ته لوڅې پښې لاړل، ترڅو ټولو ته د سولې پيغام ورسوي.