علي وزیر او محسن داوړ: پاکستاني حکومت راته ویلي چې بهر ته د تلو اجازه نه لری

د پاکستان د ملي اسمبلۍ غړي او د پښتون ژغورنې غورځنګ دوه مخکښ فعالان علي وزير او محسن داوړ له پوښتنو ګروېږنو وروسته خوشي شوي دي. دوی پرون په پېښور کې د پاچا خان هوایي ډګر کې درول شوي وو. محسن داوړ پر ټویټر یوه پیغام کې تایید کړې چې دوی دوبۍ ته له تلونکې الوتکې ګرځول شوي وو، پاسپورټونه ترې اخیستل شوي وو، خو اوس خوشي شوي دي. ویل کېږي، علي وزیر هم خوشی شوی، خو ورته ویل شوي چې محکمې ته به حاضرېږې. علي وزیر له سویلي وزیرستانه او محسن دوړ له شمالي وزیرستانه د پاکستان قومي اسمبلۍ کې د خلکو استازي دي. پښتون ژغورنې غورځنګ فعالان ادعا کوي چې د پاکستان د پلټنې مرکزي ادارې چارواکو له هغوى پاسپورټونه اخيستي دي او ورته ويل شوي چې ځکه یې د سفر مخنیوی شوی، چې نومونه یې په هغه ليست کې شامل دي چې بهرته د تلو اجازه نه لري.