احزاب: د سولې په تړاو د حکومت اقدامات کمپایني بڼه لري

سیاسي احزاب وايي، د سولې په اړه د وروستي هیئت ټاکل کېدل په راتلونکو انتخاباتو کې د رایو د ترلاسه کولو لپاره هڅه ده. سیاسي احزاب وایي، چې سوله د ټولو افغانانو لپاره تر هرڅه لومړیتوب لري، خو حکومت په دې برخه کې ډېر فرصتونه ضایع کړي او اوس، چې د حکومت موده په پوره کېدو ده د مذاکراتو لپاره داسې یو هیئت ټاکل شوی، چې هیڅ لوري ته د منلو نه دی. په ورته مهال د ملي شورا غړي هم حکومت د سولې لپاره د ارادې په نه لرلو تورنوي او وایي، چې د سولې مذاکراتو لپاره ټاکل شوی هیئت بې صلاحیته دی او ولسي نفوذ نه لري. خو ولسمشرۍ ماڼۍ وايي، چې د سولې لپاره د ټاکل شوي هیئت په تړاو دوی له ټولو احزابو سره له مخکې سلا مشورې کړي دي.