د امریکا د متحده ایالتونو له خوا د سولې د روانو هڅو په لړ کې د سولې عالي شورا وايي، په دغه بهیر کې ابهام د ستونزو د حل لار نه شي کېدای.
د دې شورا منشي امین الدین مظفري که څه هم په دې اړه جزیات ور نه کړل، خو ټینګار یې وکړ چې ښکېلې خواوې باید له رامنځته شوي فرصته استفاده وکړي.
نوموړي په دې اړه ازادي راډیو ته وویل: «ابهام او مجهولیت د سولې په بهیر کې د حل لار نه ده، کوم فرصتونه چې د سولې لپاره نن سبا رامنځته شوي، تر بل هر وخت کافي دي او په دې اړه چې کومې خبرې شوې، فکر کوم د سولې د بهیر لپاره یې ډېرې اسانتیاوې رامنځته کړې دي».
دا څرګندونې په داسې حال کې کېږي چې د سولې د مشورتي بورډ يوه غړي عبدالحکیم منیب په دې وروستیو کې ویلي چې د سولې په برخه کې د امریکا د بهرنیو چارو وزارت ځانګړي استازي زلمي خلیلزاد هڅې مبهمې دي.
منیب چې د افغانستان د حج او اوقافو وزارت مرستیال هم دی، ویلي چې خلیلزاد باید په دې اړه افغانانو ته وضاحت ورکړي چې د سولې لپاره یې څه ډول تګلاره پر مخ وړې.
د افغانستان د سولې لپاره د امریکا ځانګړي استازي زلمي خلیلزاد چې له طالبانو سره يې د خپلو لیدنو کتنو په اړه څو ځلې له افغان چارواکو او سیاسي څېرو سره معلومات شریک کړي، دا یې هم ویلي چې امریکا د افغانستان د تراژيدۍ ختمولو ته بېړه لري.
خلیلزاد چې په قطر کې یې څو ځلې له طالب استازو سره مذاکرات کړي، ويلي، هیله لري چې د ولسمشرۍ له انتخاباتو وړاندې له طالبانو سره د سولې هوکړه وشي.
په ورته وخت کې ولسمشر محمد اشرف غني هم ویلي چې د سولې د هوکړې او په ټولنیز بهیر کې د طالبانو د يوځای کېدو لپاره پنځه کاله وخت په نظر کې نیول شوی دی.
بلخوا د مشرانو جرګې دویم مرستیال محمد اصف صدیقي وايي، د سولې په بهیر کې د زلمي خلیلزاد په هڅو کې ابهام وجود نه لري او ټول باید د دغه ملي بهیر د بریا لپاره هڅې وکړي.
نوموړي ویلي: «تر دې مهاله زه د سولې د روانو هڅو په لړ کې کوم ابهام نه وینم، ځکه چې ښاغلي خلیلزاد د افغان چارواکو، جهادي مشرانو، سپين ږيرو او د ټولنې له مختلفو اقشارو سره لیدلي دي، دا شان یې عربي هېوادونو ته هم سفرونه کړي او د طالبانو له استازو سره یې کتلي دي او معلومات یې له رسنیو سره شریک کړي دي.»
په ژنیو کې د سولې په اړه د افغان چارواکو له څرګندونو وروسته طالبانو د تل په څېر بیا هم ویلي چې له افغان حکومت سره خبرو ته چمتو نه دي، خو د مرکزي او جنوبي اسیا لپاره د امریکا د بهرنیو چارو وزارت مرستیالې الېس وېلز له طالبانو غوښتي چې له شته فرصتونو په استفادې، له افغان حکومت سره د سولې خبرو ته کېني.
وېلز ویلي، که څه هم د سولې لپاره کوم ضرب الاجل نه دی ټاکل شوی، خو په خبره یې چې سولې ته د رسېدو لپاره ژر تر ژره اقداماتو ته اړتیا ده.
