په دې وروستیو کې په هوايي بریدونو کې د ملکیانو د مرګ ژوبلې زیاتېدو د ولسي جرګې اندېښنې راپارولې او دوی له افغان حکومت او ملاتړو غوښتي چې د هوايي بریدونو پرمهال د ملکي وګړو خوندیتوب ته جدي پام وکړي.
د دې جرګې دویم مرستیال امیر خان يار چې د ولسي جرګې د شنبې د ورځې عمومي غونډې مشري يې هم کوله، وویل چې د جګړې پرمهال ملکیانو ته د تلفاتو اوښتل هغه که له هرې غاړې وي، د بشریت ضد کړنه ده.
نوموړي وویل: «د عامو خلکو په شهادت رسول که له هرې خوا وي، که دا افغان حکومت دی، که ملاتړي یې دي او که وسله وال مخالفین دي، د منلو نه دي، باید د خلکو خوندیتوب ته پام وکړي، دوی باید د عملیاتو پرمهال د ښځو، ماشومانو او بې طرفو خلکو ژوند ته جدي پاملرنه وکړي.»
دا په داسې حال کې ده چې نیویارک ټایمز امریکايي ورځپانې لیکلي چې په افغانستان کې په هوايي بریدونو کې د ملکیانو مرګ ژوبله زیاته شوې ده.
د دې ورځپاڼې د معلوماتو له مخې، يوازې په تېره اونۍ کې په افغانستان کې ۸۹ کسان وژل شوي چې له ډلې يې ۵۳ ملکیان دي او زیاتره په هوايي بریدونو کې وژل شوي دي.
د تېرې سې شنبې په ورځ د هلمند په ګرمسیر کې د بهرنیو ځواکونو له خوا په يوه هوايي برید کې ۲۳ ملکي وګړو ته مرګ ژوبله واوښته.
ملګرو ملتونو تېره میاشت ویلي وو چې په افغانستان کې له ۲۰۰۹ ز کاله په را وروسته کلونو کې د بل هر وخت په پرتله د روان کال په لومړیو نهو میاشتو کې په هوايي بریدونو کې د ملکي وګړو د مرګ ژوبلې شمېره لوړه وه.
بلخوا پکتیکاوالو په مرکز ښرنه کې د افغان او بهرنیو ځواکونو د هوايي او ځمکنیو عملیاتو پرمهال د ملکي وژنې په غبرګون کې لاریون وکړ او له افغان حکومته یې وغوښتل چې د هوايي او ځمکنیو عملیاتو پرمهال د ملکي خلکو ژوند ته پام وکړي.
د لاریون کوونکو په خبره، څو ورځې وړاندې د ياد ولایت په ګومل ولسوالۍ کې د افغان او بهرنیو ځواکونو په عملیاتو کې اووه ملکي وګړي ووژل شول او پنځه نور ټپيان شول چې ښځې او ماشومان هم پکې شامل دي.
په افغانستان کې مېشتو بهرنیو ځواکونو ویلي چې دا هوايي عملیات د دوی له خوا شوي او د وژل شویو کسانو په اړه څېړنې کوي.
يوشمېر افغان کارپوهان او عام وګړي وايي، د هوايي حملو پرمهال د لازم دقت نشتوالی او نه همغږي د دې لامل کېږي چې ملکیانو ته مرګ ژوبله واوړي.
