په ولسي جرګه کې د غزني د خلکو یوشمېر استازي په دغه ولایت کې د ولسي جرګې د ټاکنو د اعلان شوې نېټې په اړه د بیا غور غوښتنه کوي.
د ټاکنو خپلواک کمېسیون له خوا د ولسمشرۍ له انتخاباتو سره یو ځای د غزني ولایت لپاره د ولسي جرګې د انتخاباتو له اعلانه وروسته په ولسي جرګه کې د غزني یوشمېر استازي په دغه ولایت کې د ولسي جرګې د ټاکنو د اعلان شوې نېټې په اړه د بیا غور غوښتنه کوي.
په ولسي جرګه کې د غزني د خلکو استازو علي اخلاقي او نفیسې اعظیمي د شنبې د ورځې په عمومي غونډه کې په غزني ولایت کې سړې هوا او ځينو نورو ستونزو ته په پام له ولسي جرګې وغوښتل چې پر خپله دغه پرېکړه بیا غور وکړي.
دوی وویل: «کله چې طالبانو د غزني په ښار حمله وکړه، د انتخاباتو ولایتي دفتر یې وسوځاوه، هېڅ شی هم نه دي پاتې، نو ځکه باید نوې تذکرې توزېع شي او سټېکرونه ورباندې ووهل شي، فکر کوم چې په دې دریو او څلورو میاشتو کې چې په غزني ولایت کې واوره هم اوري او لارې بندې دي، امکان به یې نه وي.
غزني یو صعب العبور او سوړ ولایت دی او خلک یې اصلاً رسیده ګي نه شي کولای چې په انتخاباتو کې ګډون وکړي، د انتخاباتو خپلواک کمېسیون باید په غزني کې د انتخاباتو پر مهالوېش له سره غور وکړي.»
دا په داسې حال کې ده چې د ټاکنو خپلواک کمېسیون د تېرې چهارشنبې په ورځ د جمهوري ریاست د ټاکنو بشپړ مهالوېش، د غزني د ولسي جرګې او د ټولو ولایتونو د ولسوالیو او ولایتي شوراګانو د ټاکنو نېټه اعلان کړه.
په اعلان شوې پرېکړه کې د ولسمشرۍ او په غزنې ولایت کې د ولسي جرګې د ټاکنو نېټه د ۱۳۹۸ لمریز کال د وري د میاشتې ۳۱ مه ټاکل شوې ده.
په ورته وخت کې د ټاکنو خپلواک کمېسیون د غزني د ځینو استازو د دې غوښتنې په ځواب کې وايي، د غزنې د ټاکنو لپاره ټاکل شوې نېټه وروستۍ ده او په تر سره کېدو کې به يې هېڅ ستونزه نه وي.
د دغه کمېسیون د ویاند مرستیال عبدالعزیز ابراهیمي له ازادي راډيو سره په خبرو کې وویل چې کمېسیون د ټولو مواردو په نظر کې نیولو سره دا پرېکړه کړې ده.
نوموړي زیاته کړه: «موږ د غزني ولایت د انتخاباتو لپاره خپل چمتووالی لرو، دا پرېکړه وروستۍ ده او له تخنیکي ارزونو وروسته کمېسیون دا پرېکړه وکړه. اوس پلان دا دی چې له پرېکړې سره سم د حمل په ۳۱ مه انتخابات تر سره کړو.
