امریکن کانزروېټېو: په افغانستان کې د امریکا ماتې نږدې ده

امریکن کانزروېټېو نشریې په خپل یوه مطلب کې د افغانستان جګړې ته اشاره کړې ده. د مطلب لیکوال د امریکايي پوځ پخوانی افسر دی او هغه وايي چې امریکا په افغانستان کې د سیاسي ماتې تر څنګ نظامي ماتې او شکست ته هم نږدې شوې ده. دني جورسن نشریې ته په خپل مطلب کې لیکلي دي چې امریکايي ځواکونو ۱۷ کاله پر افغان خاوره بمونه وغورځول، د افغان ځواکونو ځمکنی او هوايي ملاتړ یې وکړ، جګړې یې وکړې، تلفات یې ورکړل خو سره له دې هلته هېڅ ډول مثبت بدلونونه را نه غلل. سرچینه زیاتوي چې په وروستي کال کې امریکايي ځواکونو د هوایي بریدونو دډېرولو پرېکړه هم وکړه، چې دې مسئلې نه یوازې ترهګرې ډلې کمزورې نه کړې بلکې طالبان او نورې ډلې تر پخوا لا پیاوړې شوې. د مطلب لیکوال وایي ټولو مسایلو ته په کتو ویلی شو، چې امریکا نه یوازې دا چې په نظامي برخه کې بریالۍ شوې نه ده، بلکې په سیاسي برخه کې یې هم شکست خوړلی دی. د مطلب لیکوال وایي دا به غوره وي چې امریکا ژر تر ژره خپل شکست ومني او په افغانستان کې له روانو حقایقو سره په خلاصو سترګو چلند وکړي.