د امریکا ددفاع وزیر: په افغانستان کې جګړه ختموو، خو د سرتېرو د ایستلو پلان نه لرو

امریکا وایي په افغانستان کې د جګړې ختمول غواړي خو خپل سرتېري له دغه هېواد نه وباسي. د امریکا ددفاع وزیر جیمز متیس ویلي، امریکا په ټول توان هڅه کوي چې په افغانستان کې اوږده جګړه پای ته ورسوي، سیاسي مذاکرات پایلې ته ورسېږي خو تر اوسه یې په دې اړه پرېکړه نه ده کړې چې خپل ځواکونه په لنډمهال کې له دغه هېواد وباسي. جیمز متیس همدا راز ویلي چې په افغانستان کې د سولې راوستل یوازې د امریکا کار نه دی، بلکې طالبان هم باید په دې برخه کې همکاري وکړي. دده په خبره د سیمې هېوادونه او ملګري ملتونه هم باید د افغانستان د سولې له پروسې سره هر اړخیزه مرسته وکړي او دغه هېواد ته ثبات راولي. نوموړي دغه راز ویلي چې طالبانو د افغان حکومت د سولې وړاندیز و نه مانه او دوی ثابته کړه، چې د افغانانو ژوند ورته ارزښت نه لري. جیمز متیس وایي د امریکا حکومت تر دې دمه د خپلو ځواکونو د ایستلو په اړه هېڅ راز پرېکړه نه ده کړې او غواړي چې د ۴۱ هېوادونو له سرتېرو سره څنګ په څنګ هلته د ترهګرۍ ضد مبارزې ته ادامه ورکړي. نوموړي زیاته کړې چې امریکا او یاد هېوادونه په افغانستان کې له ۲۰ ترهګرو ډلو سره په جګړه بوخت دي او دغه ډلې باید ماتې کړل شي. متیس داسې مهال یادې څرګندونې کړې چې ګڼې رسنۍ له افغانستان د امریکايي ځواکونو د وتلو په اړه راپورونو او تحلیلونه خپروي. دوی وايي امریکا غواړي له افغانستان خپل ځواکونه وباسي نو ځکه یې د سولې پر خبرو ډېر تمرکز کړی دی.