د کار او ټولنیزو چارو وزارت د افغان ماشومانو په ناوړه وضعيت اندېښنه څرګندوي.
دغه وزارت وايي، په دغه هېواد کې روانو جګړو ماشومان هم ډېر اغېزمن کړي او له ډول ډول ستونزو سره مخ دي.
د کار او ټولنیزو چارو وزیر فیض الله ذکي تېره ورځ د ماشومانو ستونزو ته د رسېدو په موخه له ځینو بهرنیو ادارو سره د یوې مشورتي ناستې پرمهال وویل، دا مهال له افغان ماشومانو د درنو کارونو ترڅنګ د جګړې په ليکو کې هم کار اخيستل کېږي.
نوموړي وویل: «په جګړو کې ماشومانو ته ډېر زیان رسېږي، په ځانګړې توګه د دولت وسله والې ډلې په ماشومانو هېڅ ډول رحم نه کوي چې ډېر تلفات د هغوی د عملیاتو پر مهال ماشومانو ته اوړي، یوشمېر ماشومان بیا معتاد دي او یوه بله کټه ګوري ماشومان چې له ناوړه وضعيت سره مخ دي، هغه محبوسین دي. په ټوله کې ۲۵ کټه ګورۍ ماشومان دي چې زیان منونکي دي، خو تر ټولو د پام وړ ستونزه دا ده چې لږ تر لږه ۳،۷ میلیونه ماشومان ښوونځي ته له تګه پاتې دي.»
دغه وزارت وايي، له شته هڅو سره سره بیا هم له وخته مخکې ودونه، درانه او زیات کارونه، زده کړو ته نه لاسرسی، روغتیايي ستونزې، په جګړو کې له ماشومانو استفاده، تاوتریخوالی، معلولیت، بېځایه کېدل او په سرحدونو کې له ماشومانو سره ناوړه چلند، هغه موارد دي چې د افغان ماشومانو ژوند ګواښي.
دا په داسې حال کې ده چې تر دې وړاندې هم په افغانستان کې د بشري حقونو سازمان او د ماشومانو د ملاتړ ملي او نړیوالې ادارې اندېښنه ښودلې چې د حکومت مخالفو وسله والو ډلو له لوري په جګړه کې ماشومان کارول کېږي.
د بشري حقونو د خپلواک کمېسیون د شمېرو له مخې، دا مهال په هېواد کې له ۵ تر ۶ میلیونه بېوزله ماشومان له خطر سره مخ دي.
په ورته وخت کې یونیسف یا د ماشومانو لپاره د ملګرو ملتونو وجهي صندوق له ماشومانو د ملاتړ موسسې یا سېف د چلډرن او یوشمېر نورو ادارو هم په افغانستان کې د ماشومانو د ناوړه وضعيت په اړه اندېښنه ښودلې ده.
