د پکتيا د زرمت ولسوالۍ په سهاکو سيمه کې کمپاین ځواکونو چې بهرنیو ځواکونو یې ملتیا کوله، یو ځل بیا په عملياتو کې د ښځو او ماشومانو په ګډون دوولس ملکي وګړي وژلي، څلور تنه يې ټپيان کړي او پنځه تنه نور یې له ځانه سره بېولي دي. د دې ولسوالۍ يو شمېر اوسېدونکو چې د وژل شويو کسانو جسدونه یې د اعتراض په ډول د کابل ـ ګردېز په لویه لاره کې د ولايت مقام ودانۍ ته څېرمه اېښي وو، وویل چې کمپاین ځواکونو یې پر کورونو چاپه وهلې دروازې یې په بمونو الوځولي او دغو کسانو ته چې ښځې او ماشومان هم پکې دي، مرګ ژوبله اړولې ده.
اعتراض کوونکو لويه لاره بنده کړې وه او په سيمه یيزې ادارې يې نيوکې کولې چې د ملکي خلکو ژوند ته پام نه کوي.
اعتراض کوونکو وويل، د شپې دوولس بجې د امريکايي ځواکونو له لوري روزل شوي د کمپاين په نوم ځواکونه چې د بهرنیو ځواکونو یې ملتیا کوله، د دوی کورونو ته ورغلي دروازې یې په بمونو الوځولي او دغو کسانو ته یې مرګ ژوبله اړولې ده.
د نور آغا په نوم یوه اعتراض کوونکي وویل: «تېره شپه په دوولسو بجو نه طالب د باندې ګرځېدو، نه يې جبهه نيولې وه، ټول خلک په کورونو کې ويده وو او د کمپاین ځواکونو په خپلو کورنو کې ويشتلي دي».
د پکتيا مرستيال والي ويلي، د یادې پېښې په اړه یې د زرمت ولسوالۍ د قومي مشرانو په ګډون دولتي هيئت ټاکلی چې جزیات به یې وروسته له رسنیو سره شریک کړي.
دا په داسې حال کې ده چې تر دې وړاندې هم کمپاین ځواکونو چې قومانده یې د امریکایي ځواکونو په لاس کې ده، په پکتیا، خوست، پکتیکا او لوګر ولایتونو کې په هوايي بریدونو او شپنیو عملیاتو کې ملکي وګړو ته مرګ ژوبله اړولې.
بلخوا د غزني په ناوې ولسوالۍ کې د بهرنیو ځواکونو په هوایي برید کې درې تنه ملکي وګړي وژل شوي او یو شمېر نور ټپیان دي.
په دې وروستيو کې د ګډو ځواکونو هوایي بریدونو او شپنیو عملیاتو زور اخیستی چې تر ډېره پکې ملکي وګړي په نښه کېږي، خو حکومت بیا پرې چوپتیا غوره کړې.
