د ناټو سرمنشي وايي، د افغانستان پرېښودل، د ناټو لپاره په دغه هېواد کې له پاتې کېدو څخه ډېر لګښت غواړي.
نوموړي په افغانستان کې د ګڼو ننګونو او په وروستيو مياشتو کې د ناټو متحدينو مرګ ژوبلې ته اشاره وکړه او ويې ويل: «د ناټو لپاره خورا مهمه ده، څو په افغانستان کې خپل شتون ته دوام ورکړي».
نوموړي په افغانستان کې خطر د ناټو غړو هېوادونو لپاره خظر وباله او ويې ويل چې افغانستان له مالي او انساني اړخه ناټو ته زيات اهميت لري.
هغه زياته کړه: «په وروستيو مياشتو کې د ناټو متحدينو ته په افغانستان کې زياته مرګ ژوبله اوښتې ده».
د ناټو ياد لوړپوړي چارواکي زياته کړه، که ناټو افغانستان پرېږدي، له شک پرته طالبان راستنېږي او په دغه هېواد کې به خپل حضور پياوړی کړي.
نوموړي وويل: «له افغانستان سره مرسته، د ناټو غړو هېوادونو سره مرسته ده».
د ناټو سرمنشي په افغانستان کې د ولسمشرۍ ټاکنو په اړه د يوې پوښتنې په ځواب کې وويل چې افغانستان کې د جمهوري رياست ټاکنو ترسره کول ډېر مهم دي، خو دا چې څه مهال ترسره شي، جلا موضوع ده.
نوموړي زياته کړه، پارلماني ټاکنو کې له ترلاسه شويو تجربو څخه بايد د ولسمشرۍ په ټاکنو کې هم ګټه واخيستل شي .
هغه د ولسمشرۍ ټاکنو د امنيت ټينګښت خورا مهم وباله او ويې ويل چې ناټو غواړي ډاډ ترلاسه کړي چې افغان امنيتي ځواکونه د جمهوري رياست د ټاکنو امنيت په سمه توګه ټينګولی شي.
