په داسې حال کې چې د ټاکنو خپلواک کمېسیون له لوري د ولسي جرګې د ټاکنو رای شمېرنه روانه ده او د یوشمېر ولایتونو لومړنۍ پایلې هم اعلان شوې، د ولسي جرګې یوشمېر غړي وايي چې له بایومټریک پرته د رایو شمېرنه ورته د منلو وړ نه ده.
د دې جرګې یوشمېر غړو د دوشنبې د ورځې په عمومي غونډه کې غوښتنه وکړه چې باید پاکې رایې له ناپاکو جلا شي؛ ځکه د دوی په وینا، په ټاکنو کې پراخه درغلي شوې ده.
د دې جرګې دوو غړو مولوي موحد او سیدنادرشاه بهر وویل: «له بده مرغه خلکو ته زمینه برابره نه شوه چې د بایومټریک په وسیله رایې استعمال کړي، د کمېسیون له خوا دا دستګاه قصداً خرابه کړای شوې وه. په ځینو ځایونو کې یې پروسه ناوخته پیل کړه او په ځینو ځایونو کې یې په لوی لاس دغسې وغوښتل.»
«بایومټریک او غیر بایومټریک رایې باید تفکیک شي او د بایومټریک په وسیله استعمال شوې رايې باید تایید شي، نه له بایومټریک پرته رايې».
د ولسي جرګې غړو همدا شان د هغو کسانو عدلي او قضايي ارګانونو ته د معرفي کولو غوښتنه وکړه چې د دوی په وینا، په ټاکنو کې يې درغلۍ کړې او یا يې هم درغلۍ ته زمینه برابره کړې ده.
د ولسي جرګې په ټاکنو کې د بایومټریک استعمال هغه جنجالي مسئله وه چې د ټاکنو په ورځ يې یوشمېر تخنیکي ستونزې رامنځته کړې او له امله یې کمېسیون اړ شو چې په ځینو مرکزونو کې له بایومټریک پرته د رایو استعمال ته اجازه ورکړي.
که څه هم له ټاکنو وروسته د ټاکنیزو شکایتونو او د ټاکنو د کمېسیون ترمنځ په دې مسئله جنجال راپورته شو، خو له څو ورځنیو بحثونو وروسته پرېکړه وشوه چې هغه رايې چې د ټاکنیز نوملړ او سټېکر په وسیله له بایومټريک پرته استعمال شوې هم وي، د شمېرلو وړ دي.
د ټاکنو خپلواک کمېسیون تراوسه په څو پړاوونو کې د ۱۸ ولایتونو د ټاکنو پایلې اعلان کړې او ټاکل شوې چې په راتلونکې اونۍ کې د پاتې نورو ولایتونو لومړنۍ پایلې هم اعلان شي.
د ولسي جرګې د دوشنبې د ورځې په عمومي غونډه کې د وکیلانو له بحثونو وروسته د دې جرګې رییس عبدالروف ابراهیمي هم د ټاکنو له کمېسیونه غوښتنه وکړه چې په دې برخه کې عدالت تامین او د خلکو پاکو رایو ته احترام وکړي.
نوموړي وویل: «هغه رایې چې د بایومټریک په وسیله استعمال شوې، افغانانو ته د منلو وړ دي، دا د یوې منل شوې پایلې په توګه خلکو ته د منلو وړ دي، دې مسئلې ته باید د انتخاباتو خپلواک کمېسیون او د شکایتونو کمېسیون جدي پام واړوي».
خو د ټاکنو خپلواک کمېسیون وايي، د ټاکنو په ورځ په بایومټریک دستګاه کې ستونزې رامنځته کېدل تخنیکي مسئله وه او دوی نه شي کولای چې له خلکو د رایو حق واخلي.
د دغه کمېسیون مرستیالې ویاندې شیما عالم ازادي راډيو ته وویل چې هر کاندید که د ټاکنو پر پروسه نیوکه لري، د موضوع په اړه دې کره اسناد او شواهد د شکایتونو د اورېدو له کمېسیون سره شریک کړي.
