د مشرانو جرګې یوشمېر غړي پر حکومت نیوکه کوي چې د سولې د مذاکره کوونکي پلاوي په جوړښت کې د دوی نظر نه دی غوښتل شوی.
د دې جرګې یوشمېر غړي په داسې حال کې د سولې د مذاکره کوونکي پلاوي په جوړښت نیوکه کوي چې افغان حکومت یوه اونۍ وړاندې له وسله والو طالبانو سره د سولې د خبرو د پيل په خاطر ۱۲ کسیز پلاوی اعلان کړ.
دوی دغه پلاوی نمایشي ګڼي او وايي چې د سولې مذاکره کوونکی پلاوی په یاده برخه کې هېڅ ډول تجربه نه لري.
د دغو سناتورانو له ډلې نادر بلوڅ وايي، حکومت په دې اړه له ملي شورا په ځانګړي ډول مشرانو جرګې سره هېڅ ډول مشوره نه ده کړې.
نوموړي په دې اړه ازادي راډيو ته وویل: «د افغانستان د مشرانو جرګې غړي په دې اړه خپلې جدي اندېښنې لري؛ ځکه کوم ۱۲ کسیز پلاوی چې د سولې د مذاکراتو لپاره ټاکل شوی، هېڅ ډول تجربه نه لري او دا د ولسمشر بې اعتمادي ښیي چې پرته له یوې مشخصې کړۍ د افغانستان په ملت او د سولې عالي شورا باور لري. که داسې وکړي، نو ګټوره پایله به ونه لري.»
تر دې وړاندې د ولسي جرګې غړو او د مدني ټولنې فعالانو هم ویلي وو چې د حکومت له لوري د مذاکره کوونکي پلاوي د ګومارلو په تړاو باید ورسره مشورې وشي او د سولې په خبرو کې ټول افغانان ونډه ولري.
د سولې په عالي شورا کې هم یوې سرچینې ازادي راډیو ته ویلي، حکومت له دوی سره هم د پلاوي د ترکیب په تړاو مشوره نه ده کړې.
دا په داسې حال کې ده چې ولسمشر محمد اشرف غني تر دې وړاندې ویلي وو چې د سولې په اړه هر ګام چې اخیستل کېږي، د مشورې پر بنسټ به وي.
دا په داسې حال کې ده چې د ولسمشر مرستیال ویاند شاه حسین مرتضوي د یکشنبې په ورځ په یوه خبري غونډه کې د ۱۲ کسیز پلاوي د اعلان په اړه د خبریالانو د پوښتنو په ځواب کې وویل: «د قانون پر اساس د سولې او جګړې صلاحیت د ولسمشر او حکومت دی او د سولې د مذاکراتو طرف هم حکومت دی، د سولې عالي شورا او کومې هڅې چې ښاغلي خلیلزاد او امریکا کړې، ټول تسهیل کوونکی رول لري».
خو د مشرانو جرګې غړي ټينګار کوي، که ارګ یوازې د خپلې خوښې کسان له وسله والو طالبانو سره د خبرو لپاره ټاکي، دا به هېڅ ډول مثبته نتیجه ونه لري.
