د اسلامي همکاریو سازمان په غونډه کې د افغانستان په تړاو د پاکستان د لومړي وزیر خبرو ته غبرګونونه لا هم دوام لري. په کور دننه او بهر ګڼو سیاستوالو د عمران خان څرګندونې ناسمې ګڼلې دي او غندلي یې دي. عمران خان په افغانستان کې د ښځو د تعلیم ستونزه له پښتني کلتور سره تړلې ګڼلې وه او دغه راز تور یې لګولی و چې داعش په افغانستان کې فعال دی او له هغه ځایه پاکستان ته ستونزې جوړوي.
د عمران خان خبرې له څو اړخونو د اندېښنې او غندنې وړ دي:
لومړی دا چې پاکستان د افغانستان په تړاو د اسلامي همکاریو د سازمان د غونډې کوربه و. دا غونډه له افغانستان سره د بشري او نورو مرستو په موخه جوړه شوې وه. په داسې غونډه کې د افغانستان په تړاو دا ډول خبرې نه یوازې د دیپلوماتیکو اصولو خلاف کار دی، بلکې یوه کوربه ته نه ښايي چې د خپل مېلمه په اړه داسې د کرکې څخه ډکې او منفي څرګندونې وکړي. دویم دا چې د پاکستان لومړی وزیر ولې د افغانستان د کورنیو مسایلو په اړه څرګندونې وکړي. که پاکستان په افغانستان کې لاسوهنه نه کوي، د افغانستان خپلواکۍ ته درناوی لري، نو باید د افغانستان د کورنیو چارو په اړه څرګندونې ونه کړي او بیا داسې ناسمې او منفي خبرې خو په هېڅ ډول د منلو وړ نه دي. درېیم دا چې په غونډه کې د افغانستان د بهرنیو چارو وزیر ګډون درلود، د افغانستان د ستونزو او مسایلو په تړاو باید هغه خبرې کړې وای، د هغه په حضور کې د افغانستان په تړاو دا ډول خبرې نه یوازې د اسلامي امارت استازي، بلکې افغانستان ته هم سپکاوي و. څلورم دا چې د پاکستان کې لومړی وزیر یو کملوستی انسان دی چې د افغانستان په اړه پوره معلومات نه لري او هغه تر دې وړاندې هم د افغانستان په اړه ډېرې ناسمې خبرې کړې دي. د بېلګې په ډول هغه «حقاني» د افغانستان یوه قبیله بللې وه، چې دا د هغه د جهالت او ناپوهۍ ښکاره ثبوت دی. پینځم دا چې د هغه خبرې ناسمې هم وې، ځکه همدا پښتانه د پاکستان تر کنټرول لاندې سیمو کې هم اوسېږي، خو هلته تر پنځوس میلیونه پښتانه دا ستونزه نه لري، خپلې خویندې او لوڼې ښوونځیو او پوهنتتونو ته لېږي، نو له ډیورنډ کرښې دېخوا پښتانه به ولې متفاوت وي، په داسې حال کې چې ټول افغانان دي، قوم، ژبه، تاریخ، دین او ارزښتونه یې یو ډول دي. واقعیت دا دی چې دا د دولتونو تګلارې دي او حالات دي چې دا ډول ستونزې زیږوي. ګڼ نور دلایل هم شته چې پر اساس یې ویلی شو چې د عمران خان خبرې ناسمې او له کرکې، دښمنۍ او منافقت څخه ډکې وې.
اسلامي امارت ته پکار ده چې په نړیوالو دریځونو د افغانستان پیاوړی استازیتوب وکړي. نورو هېوادونو ته اجازه ور نه کړي چې د افغانستان د کورنیو چارو په اړه څرګندونې وکړي او بیا په ځانګړي ډول پاکستاني چارواکي باید نور د افغانستان په تړاو له څرګندونو او استازیتوب څخه را وګرځول شي. اسلامي امارت باید د پاکستان د لاسوهنې او دښمنۍ په اړه واضح دریځ ولري او په دې اړه د افغانستان د خلکو اراده تمثیل کړي.
