د اسلامي امارت د چارواکو له پرله پسې ټینګار سره سره له پخوانیو نظامیانو او حکومتي کسانو سره د زور زیاتي پېښې لا هم شته. په دې ورځو کې په ټولنیزو رسنیو کې د اردو د یوه پخواني افسر ډګرمن رحمت الله قادري ویډیو خپرېږي، چې په ظاهره د اسلامي امارت د کسانو له خوا سخت شکنجه کېږي. په ځینو نورو ولایتونو کې هم د پخوانیو نظامیانو د نیولو، بندي کولو او شکنجه کولو خبرونه ورکول شوي دي. اسلامي امارت ویلي چې دوی عمومي عفوه کړې ده او هېڅوک نشي کولی چې پخواني کسان ونیسي، بندي او شکنجه یې کړي او که څوک دا کار کوي، نو سرغړونه ده او له سرغړوونکو سره به جدي چلند کېږي. پوښتنه دا ده چې له عمومي عفوې او په دې اړه د امارت د چارواکو له سخت دریځ سره سره ولې دا پېښې لا هم روانې دي؟
د پخوانیو نظامیانو او حکومتي کسانو ځورونې او شکنجې د درې ډوله کسانو له خوا کېږي. لومړۍ ډله د امارت هغه وسله وال دي چې پخوانیو نظامیانو، قاضیانو، څارنوالانو یا نورو مسوولینو ورسره زیاتی کړی دی، د کورنۍ غړي یې ور وژلي، بندي کړي او شکنجه کړي دي. دوی د شخصي غچ په موخه دا کار کوي او په دې برخه کې د امارت لارښوونې ته پام نه کوي. دا پېښې ځیني په پټه او ځیني په ښکاره کېږي. دویمه ډله هغه کسان دي چې شخصي دښمنۍ لري، د دوی شخصي دښمنان په پخواني حکومت کې پیاوړي وو، اوس چې پخوانی حکومت نشته، نو دوی خپل دښمن کمزوری ویني او همدا د خپل دښمن د ځپلو لپاره مناسب وختي ګڼي. درېیمه ډله د امارت هغه رسمي مامورین او ارګانونه دي چې د خپلو مشرانو امر جدي نه ګڼي، دوی په واضح ډول له عمومي عفوې او د مشرانو له اوامرو سرغړونه کوي، پخواني خلک نیسي، بندي او شکنجه کوي یې.
له عمومي عفوې سره سره د پخوانیو نظامیانو او مامورینو نیول، بندي کول او شکنجه کول، په هېڅ ډول د توجیه وړ نه دي. دا سمه ده چې دا د اسلامي امارت رسمي تګلاره نه ده، چې دا کار وشي او دوی یې نه غواړي، خو دا یې دنده ده چې مخه یې ونیسي. که شکنجه کوونکي د امارت اړوند کسان نه وي، که د امارت نظامیان وي، که په شخصي او یا بله هر انګیزه دا کار کوي، باید مخه یې ونیول شي او له سرغړوونکو سره جدي او قانوني چلند وشي. ښايي امارت په دې برخه کې جدي هم وي، خو چې کله له حکومتي ادارو سره د داسې پېښو رسمي رپوټ ثبتیږي، یا هم په دې اړه خبرونه خپریږي، په جدیت باید کار وشي، عاملین یې باید پیدا شي، سزا ورکړل او بیا په دې اړه د شوو اقدامانو په اړه ولس ته هم پوره معلومات ورکړل شي. سرغړونې په هر دولت کې وي، خو کله چې چارواکي جدي غبرګون وښيي او له سرغړوونکو سره جدي او عملي چلنده خلک هم خبر کړي، بیا خلک پرې باور کوي او دا احساس ورسره پیدا کېږي چې که څوک ورسره ظلم او زیاتی کوي، دولت به یې پوښتنه کوي.
په ټوله کې دولت باید د پخوانیو نظامیانو او نورو کسانو د نیولو، بندي کولو او شکنجې په مخنیوي کې په جدیت کار وکړي، ځکه دا کار د عمومي عفوې روحیې ته زیان رسوي او په کور دننه او بهر د اسلامي امارت تصویر او دریځ زیانمنوي.
