افغانستان د واورو او بارانونو له یوې څپې سره مخ دی. په ډېرو ولایتونو کې واوره ورېدلې او لا هم روانه ده او په ځینو ولایتونو کې سخت بارانونه اورېدلي دي. د واورو ورېدو له امله د ځینو لرې پرتو سیمو لارې بندې شوي دي او د بارانونو له امله سیلابونه راوتلي دي چې خلکو ته یې مالي او ځاني زیانونه اړولي دي. په ځینو سیمو کې د یخنۍ له امله هم د ماشومانو د مړینې او ناروغۍ خبرونه ورکړل شوي دي.
د واورو او بارانونو اورېدو، که له یوه اړخه دا هیله زیاته کړې چې راتلونکی کال به وچکالي کمه وي، له بله اړخه افغانان له سخت ناوړه حالت سره مخ شوي دي. لکه چې ملګري ملتونه وايي دغو اورښتونو بشري ناورین زیات کړی دی. د اورښتونو له امله د خلکو کاروبار زیانمن شوی دی، هغه کسان چې د ورځني مزد په مقابل کې کار کوي، اوس ورته کار نشته، ددې تر څنګ د توکو د لېږد په برخه کې هم ستونزې شته، ځکه چې ډېری لارې بندي دي او تګ راتګ پرې نه کېږي. ددې تر څنګ د افغانستان ډېرو خلکو بشري مرستو ته اړتیا لرله او ټاکل شوې وه چې خیریه بنسټونه خپلې را ټولې کړې مرستې دغو اړمنو ته ورسوي، خو اوس ډېرو سیمو، په ځانګړي ډول لرې پرتو سیمو ته ددغو مرستو رسول ستونزمن شوي دي. د ښارونو ترڅنګ په لرې پرتو سیمو کې هم غربت زیات دی، له همدې امله هلته خلک بېړنیو مرستو ته اړیتا لري. اوس چې واورو او بارانونو ستونزې پیدا کړې دي او لارې یې بندې کړي دي، نو ددې وېره ده چې لا ډېر خلک به له ستونزو سره مخ شي او ان هلته د لوږې او یخنۍ له امله د خلکو، په ځانګړي ډول ماشومانو د مړینه وېره زیاته شوې ده.
پر افغانستان واکمن اسلامي امارت له اقتصادي اړخه له ستونزو سره مخ دی او نشي کولی چې دغو اړمنو ته پوره مرستې ورسوي، خو نړیوالې ټولنې هم یوازې د ژمنو تر بریده ګام اخیستی دی. ملګري ملتونه او نور مرستندویان پوهېدل چې سخت ژمی را روان دی، خو بیا یې هم له اړمنو سره مرسته ونه کړه. تر اوسه پورې د دوی له خوا شوې مرسته په نشت حساب ده او داسې کومه مرسته یې نه ده کړې چې د اړمنو ستونزې حل کړي. د دوی د بې غورۍ او نه عمل له امله اوس په لرې پرتو سیمو کې بشري ناورین تر بل هر وخت زیات شوی دی او د لا زیاتېدا وېره یې هم شته.
په اوس وخت کې د زیاتېدونکي بشري ناورین د مخنیوي لپاره پکار ده چې نړیواله ټولنه او خیریه بنسټونه په واقعي مانا مرستې وکړي. دوی باید په چټکۍ سره کار وکړي، ځکه ددې وېره ده چې ژمی به لا سخت شي، نو ځکه باید ژر تر ژره اړمنو کسانو ته د مرستو د رسولو لپاره ګامونه پورته کړي. د افغانستان اسلامي امارت هم باید له خپله اړخه پوره مرسته وکړي او له مرستندویانو سره ګډ کار وکړي څو په لرې پرتو سیمو کې ددغه بشري ناورین په کمولو او یا له منځه وړلو کې اغېزناک کار وشي.
