محمد خان: د ملکي وګړو په نښه کول جنایت او نه بښونکی عمل دی

د اجراییه ریاست لومړي مرستیال د یوې خبرپاڼې په خپرولو سره ویلي چې ملکي وګړو ته مرګ ژوبله اړول نه بښونکی عمل دی او زیاتوي چې حکومت به د هغو کسانو پر وړاندې جدي ګامونه پورته کړي، کوم چې ملکي خلک په نښه کوي او یا د هغوی ژوند له ګواښونو سره مخ کوي. په اعلاميه کې راغلي چې د ملکي او بې دفاع خلکو وژنه د انساني، بشري، اسلامي او افغاني قوانینو خلاف عمل دی. د سرچینې په وینا افغان حکومت تل هڅه کړې چې د پوځي عملیاتو او نورو جګړو پر وخت د ملکي وګړو ژوند ته ځانګړې پاملرنه وکړي او د هغوی په اړه به هم جدي او غوڅ اقدامات تر سره کړي چې بې وسه ملکي هېوادوالو ته ګواښونه رامنځته کوي. دا په داسې حال کې ده چې په دې وروستیو کې د هوایي بریدونو له امله د ملکي وګړو مرګ ژوبله خورا لوړه شوې ده.