د پاکستان، ایران او تاجکستان سفیران: د افغان سولې د ګړندیو هڅو مثبتو پایلو ته هیله من یو

په افغانستان کې د پاکستان، تاجکستان او ایران سفارت چارواکي په دغه هېواد کې د سولې په ټینګښت ټینګار کوي او وایي، په کار ده چې د سیمې او نړۍ هېوادونه د افغانانو په مشرۍ د سولې له پروسې ملاتړ وکړي. د پاکستان د سفیر مرستیال وایي، په افغانستان کې د سولې لپاره هڅې ګړندۍ شوې او هیله یې وښوده چې دا هڅې به مثبتې پایلې ولري. شهباز خان دا څرګندونې نن په کابل کې د افغانستان، پاکستان، ایران او تاجکستان د سولې د ځوانو سفیرانو په درېیمه غونډه کې کړې دي. بلخوا د ایران سفیر محمد رضا بهرامي هم یادې غونډې ته په خبرو کې په افغانستان کې پر ناوړه وضعیت اندېښنه ښودلې او زیاته کړې یې ده چې ایران د افغان جګړې ختمولو په برخه کې همکارۍ ته ژمن دی. تاجکستاني سفیر هم ویلي چې افغان سوله د سیمې ثبات لپاره مهمه ده او دوی به پر خپلو حکومتونو فشار راوړي، څو له دې پروسې سره همکاري وکړي. دا په داسې حال کې ده چې د ناټو سرمنشي ینس سټولټنبرګ پرون په یوه وینا کې د سیمې پر هېوادونو غږ کړی و چې د افغان ستونزې د حل لپاره لازمه همکاري وکړي.