سټولټنبرګ طالبانو ته: جګړه نه شی کټلی، سوله مو په ګټه ده

د ناټو عمومي منشي ینس سټولټنبرګ وایي، دوی د افغان ستونزې د هواري لپاره د افغانانو په مشرۍ د سیاسي توافق او سولې پر پروسې باور لري، خو زیاتوي چې د سیمې هېوادونو په ګدون له روسیې او ایران نه تمه لري چې د افغانانو په مشرۍ د سولې پروسې ملاتړ وکړي. سټولټنبرګ پرون په بروکسل کې د ناټو د بهرنیو چارو وزیرانو غونډې ته وویل چې ناټو او غړي هېوادونه یې د افغانانو په مشرۍ د سولې له بهیره ملاتړ کوي. نوموړي زیاته کړه چې ناټو له افغان سرتېرو سره د ښوونو، مشورو او مرستې له لارې هڅه کوي چې د افغانستان د سولې لپاره یوه سیاسي حللاره پیدا کړي. هغه زیاته کړې، دوی طالبانو ته واضح پیغام لېږي چې هغوی به په جګړه کې هېڅکله هم بریالي نه شي، نو باید د سولې په اړه د خبرو اترو مېز ته کېني او د سولې د واقعي مذاکراتو له لارې له دولت سره یو ځای شي. هغه زیاته کړه چې په افغانستان کې د شویو پرمختګونو ستاینه کوي او دوی به په افغانستان کې له ډيموکراټیک بهیره خپل ملاتړ ته دوام ورکړي.