په داسې حال کې چې د اروزګان د مرکز ترینکوټ او ولسوالیو لارې له څه باندې دوو کلونو راهیسې د طالبانو له خوا تړل شوې او ټول دولتي اکمالات د هوا له لارې د چورلکو په وسيله ترسره کېږي، د دغه ولایت د چارچینو ولسوالۍ لسګونه پوليس وايي چې له څه باندې يوې مياشتې راهيسې دوی ته د خوراکي توکو او وسلو اکمال نه دى شوى او له لوږې سره مخ دي.
د تورجان په نامه د يادې ولسوالۍ يوه پوليس پژواک ته ویلي، يوه مياشت کېږي چې اکمالات نه دي ور رسېدلي او ورځ تر بلې يې حالت خرابېږي.
نوموړی زیاتوي، په دې ولسوالۍ کې له ۹۰ زيات پولیس شته چې له لوږې سره مخ دي او ټول خوراکي او غيرخوراکي توکي يې خلاص شوي دي.
د محمدعيسی په نوم يو بل پوليس وايي چې د خوراکي توکو ترڅنګ په تېره يوه مياشت کې ورته هېڅ جنګي مهمات هم نه دي رسېدلي.
د هغه په وينا، که پر وخت اکمالات ورته ونه رسېږي، نو اړ دي چې يا دنده پرېږدي او يا هم وسله والو طالبانو ته تسليم شي.
بلخوا يوشمېر پوليس بیا شکايت کوي چې د جګړې پر مهال يې ټپيان په وخت روغتونونو ته نه لېږدول کېږي.
د ګېزاب ولسوالۍ هغه دوه پولیس چې څو ورځې وړاندې د طالبانو په بريد کې ټپيان شوي، اوس هم په ولسوالۍ کې له درملنې پرته پراته دي او مرکز ته نه دي لېږدول شوي.
د يوه پوليس پلار ميراجان وايي، اته ورځې کېږي چې زوی يې په ټپي حال په ولسوالۍ کې پروت دى، هلته هېڅ روغتيايي اسانتيا نشته او څوک يې مرکز ته هم نه لېږدوي.
هغه وايي، له مرکز ترینکوټ سره د ولسوالۍ لاره له تېرو دوو کلونو راهيسې طالبانو بنده کړې او په چورلکه کې يې څوک نه انتقالوي.
د اروزګان سیمه ییز امنيتي مسوولين هم دا ستونزې مني، خو په دې اړه له رسمي نظر ورکولو ډډه کوي.
د اروزګان د والي مرستيال عطاالله فضلي بیا وايي، ولسوالیو ته تللې ټولې لارې له تېرو څو کلونو راهیسې د طالبانو له خوا تړل شوې او دوی خپل اکمالات د نظامي چورلکو په وسيله ترسره کوي، نو ډېرى وخت له يادو ستونزو سره مخ کېږي.
هغه وايي، څو ځله یې د هوايي ځواکونو له مسوولینو سره دغه ستونزې شريکې کړې، خو دا چې د زون په کچه يوازې دوې چورلکې لري، نو ټولو ولسوالیو او لرې پرتو سیمو ته په وخت د خوراکي او غيرخوراکي توکو او مهماتو لېږد نه شي کولی.
