د امريکا ولسمشر جو بايډن يو اجرايوي فرمان لاسليک کړ، چې له مخې به يې په امريکا کې کنګل شوي د افغانستان د مرکزي بانک ۳.۵ ميليارډه ډالره د سپټمبر د ۱۱مې پېښې قربانيانو ته د خسارې ورکولو او نور ۳.۵ ميليارډه ډالره به له افغانستان سره د مرستې لپاره وکارول شي. که څه هم په تېرو څو مياشتو کې د افغانستان خلکو او نړيوالې ټولنې په ټينګار سره له امريکا څخه غوښتنه کړې، چې دغه کنګل شوې پیسې ازادې کړي، خو د دغه فرمان له مخې، دا ښکاره ده، چې امريکا ډېر مخکې دغه پانګه په خپللاس کې نیولې ده . امريکا ويلي، چې ۳.۵ ميليارډه ډالره به افغانستان ته ددغه هېواد له خلکو سره د بشري مرستې لپاره وکړي، خو دا مرسته کول دي که غلا کول دي؟
د امريکا دغه لوټماره کړنه د افغانستان په ټولنيزو رسنيو کې د خلکو د غوسې سبب شوې ده.
له دې وروسته، چې امريکا په خپله خوښه د افغانستان د پانګې وېش وکړ، د افغانستان په خبري رسنيو کې ډېرو زياتو کسانو خپله غوسه، خپګان او بې وسي څرګنده کړه او په بشپړ ډول د امريکا ددغه لوټمار منطق له امله حيران شول.
د افغانستان انټرنېټ کاروونکي احسان احسان ويلي، د سپټمبر د ۱۱مې پېښې تر شا حقیقت تر اوسه نه دی پيدا شوی. امريکا د افغانستان پانګې له نامعلومې پېښې سره تړي . دا څه منطق دی؟ تر اوسه پورې کومې نړیوالې محکمې دا ثابته کړې ، چې افغانان د سپټمبر د۱۱مې ترهګريزې پيښې تر سره کړي؟ امريکا د افغانستان پانګې د دغې پېښې ځپلو کسانو ته ورکوي، دا څه منطق او سياسي اصول دي؟ دوی اخلاق او عدالت نه لري؟
د افغاستان یو انټرنېټ کاروونکي رحماني ويلي، امريکا ځان د بشري حقوقو د دفاع کوونکی بولي، خو د امريکا دغه پرېکړه د افغانستان خلکو ته سخت زيانونه رسولي دي. د امريکا اعتبار به صفر شي. افغانانو دغه ترهګريزه پيښه نه ده تر سره کړې، د امريکا په نظر د دغې پېښې طرح کوونکی بن لادن په افغانستان کې ونه وژل شو. امريکا په دې وخت کې د افغانانو له لاس څخه دغه پانګه غلا کوي او د امريکا د سپټمبر ۱۱مې پېښې ځپلو کسانو ته یې ورکوي. دا د افغانانو لپاره ظالمانه او ناقانونه ده.
د افغانستان د خلکو پيسې دې د سپټمبر د ۱۱مې د قربانيانو د دعوې لپاره وکارول شي؟
دا ډېر څرګند حقیقت دی، چې د امريکا لخوا کنګل شوې پانګه د افغانستان د مرکزي بانک ده. په افغانستان کې د امريکا د مالیې وزارت پخوانی جګ پوړی مامور اليکس ځيرډن دا نظر لري، چې دغه پيسې په سخت وخت کې د افغانانو لپاره زېرمه شوې پانګه وه، خو امريکا اوسمهال په افغانستان کې پېژندل شوی حکومت نه لري، نو په خپله خوښه يې د دغې پانګې د کارولو پرېکړه کړې.
د سپټمبر ۱۱مې له پېښې وروسته د امريکا حکومت په افغانستان کې د ترهګرۍ ضد جګړه پيل کړه. د افغانستان خلک د دغې جګړې لپاره سختې بيې ورکړې، چې په لس ګونو زرو بې ګناه کسانو خپل ژوند له لاسه ورکړ، او بې شمېره کسان بې کوره شول. دا تصديق شوې ده، چې د افغانستان خلک هم د دغې ترهګريزې پېښې له امله زيانمن شوي دي. امريکا تر اوسه پورې افغانانو ته د جګړې تاوان نه دی ورکړی، خو په دې وخت کې چې افغانان بشري مرستو ته بېړنۍ اړتيا لري، د افغانانو پانګه غلا کوي.
په حقيقت کې د امريکا پخواني ولسمشر ډونالډ ټرمپ د ۲۰۱۹ کال د جولای په ۲۹مه د سپټمبر د ۱۱مې په پېښه کې زیانمن شويو خلکو ته د تاوان ورکولو د صندوق قانون لاسليک کړ. د دغه قانون له مخې، د امريکا حکومت بايد په راتلونکو لسو کلونو کې دغو کسانو ته ۱۰ ميليارډ ۲۰۰ ميلیونه ډالره تاوان ورکړي. ایا امریکا غواړي له دې لارې دغه مقدار پوره کړي؟او له افغانستان سره د بشري مرستو په نوم به نور ۳.۵ ميليارډه ډالره وکارول شي؟ له دې څخه په ښکاره ډول د امريکا رياکارانه جوهر څرګندیږي.
د ياد فرمان له مخې به امريکا د ۳.۵ ميليارډ ډالرو په اندازه د دريمې خواوې د اعتبار لپاره صندوق جوړ کړي تر څو له افغانستان سره بشري مرسته وکړي، خو دوی به لومړۍ ۳.۵ ميليارډ ډالره د سپتمبر د ۱۱مې پېښې کې د امريکا زيانمن شويو کسانو ته ورکړي. بله نيمه برخه به یې د اعتبار صندوق له جوړېدو وروسته وکارول شي، نو ښايي چې ډېر وخت ته اړتيا وي.
د افغانستان خلک غواړي د امريکا لخوا کنګل شوې خپله پانګه ازاده کړي، چې په اصلي ډول د دغه هېواد د بيا رغونې، د خلکو د ژوند او پرمختګ په چارو کې وکارول شي، خو امريکا دغه پيسو ته له افغانستان سره د مرستې په نامه ګوري، نيمه برخه به کمه کړي او بله نيمه برخه به دا ډول وي، چې د هغوی پيسې له هغوی سره مرسته کوي.
برسېره پر دې، د افغانستان خلک له بېړني بشري بحران سره مخ دي، خو امريکا به له څو مياشتو وروسته د دغې پانګې مشخص ترتيبات وکړي. د امريکا تش په نامه د بشري مرستو احساسات، یوازې ریاکارنه او له مطلبه ډکې کړنې دي او هېڅ وخت پرې درد نه دی دوا شوی. اوس هم غواړي د افغانانو ګټې قرباني کړي.
