د امریکا له خوا له افغانستان څخه په لسګونو زره ایستل شوي کسان لا هم په نورو هېوادونو کې بې برخلیکه پراته دي. په متحده عربي اماراتو، قطر، البانیا او ځینو نورو هېوادونو کې لسګونه زره افغانان په دې تمه پراته دي چې امریکا او یا نورو لوېدیځو هېوادونو ته به ځي. ددې تر څنګ په وروستیو کې پاکستان او د سیمې نورو هېوادونو ته هم افغانان غوښتل کېږي او ورته ویل کېږي چې له هغه ځایه به اروپايي هېوادونو، یا امریکا او کاناډا ته وړل کېږي. یوازې په متحده عربي اماراتو کې ۱۲ زره افغانان همداسې بې برخلیکه پراته دي چې په وروستیو کې یې لاریونونه هم کړي دي.
د لسګونو زرو دغو افغانانو حالت نه یوازې د دوی لپاره ځورونکی دی، بلکې دا په افغانستان کې د امریکا د ماتې او شرم یو ښکاره مثال دی. له افغانستان څخه امریکايي ځواکونو د وتلو پر مهال په بیړه لسګونه زره افغانان له ځان سره و ایستل او ان دوی ددې لپاره منظم کمپاین کاوه چې خلک هوايي ډګر ته ورشي او دوی یې وباسي. په دې کې یوازې هغه کسان نه وو چې له ګواښ سره مخ کېدل، بلکې ډېری داسې کسان وو چې هېڅ ګواښ ورته نه و. دوی د افغانستان د کمزوري کولو لپاره هڅه کوله چې په دې پروګرام کې افغان کادرونه وباسي او افغانستان ته یوه لویه ضربه ورکړي. له همدې امله یې د تخلیې پرورګرام تبلیغ کړ او ډېری کسان یې و ایستل. اوس دغه لسګونه زره افغانان همداسې بې برخلیک پراته دي. دوی نه پوهېږي چې کله به د دغو درېیمو هېوادونو له کمپونو وځي او امریکا، اروپا او یا کاناډا ته به ورځي. دا وېره هم شته چې ښايي ځیني یې هېڅ د تلو چانس پیدا نه کړي او له اوږده بې برخلیک حالت وروسته بېرته افغانستان ته ولېږل شي. آن ځینې یې اوس هم دا غواړي چې بېرته افغانستان ته ولاړ شي، خو دوی نه پرېښودل کېږي او په کمپونو کې ساتل کېږي. ددې تر څنګ د اوکراین کړکېچ دا ستونزه لا زیاته کړې، ځکه چې امریکا او اروپا اوس ددې پر ځای چې ددې ستونزې پر حل تمرکز وکړي، په اوکراین کې بوخت دي او اوس ورته دا چاره مهمه نه ښکاري.
داسې ښکاري چې امریکا ددغو ټولو افغانانو منلو ته تیاره هم نه ده او په دې وروستیو کې یې ځینو چارواکو دا خبرې کړي هم دي چې امریکا نه شي کولای چې دا ټول پناه غوښتونکي ومني. په متحده عربې اماراتو کې د ۱۲ زره افغانانو په اړه خو امریکا ویلي چې دا کسان د دوی د پناه ورکولو په شرایطو برابر نه دي، نو ځکه دوی له نورو هېواودنو سره خبرې کوي چې دا کسان ومني. معلومه نه ده چې نور هېوادونه به حاضر شي چې دا کار وکړي او که نه، خو دا معلومه ده چې د اوږده وخت لپاره به دا افغانانو بې برخلیکه پراته وي.
له بده مرغه له دې ټولې رسوایۍ او ستونزو سره سره لا هم ځیني افغانان له هېواده د وتلو هڅې کوي او ځینې یې اوس هم د امریکا او اروپا په تمه پاکستان او د سیمې نورو هېوادونو ته ورځي. دا سمه ده چې په افغانستان کې به ستونزې وي، اقتصادي حالت به خراب وي، کار به نه وي، خو له دې هر څه سره سره دا زموږ هېواد دی، دلته زموږ عزت دی. ستونزې به ورو ورو حل شي، خو هغه ذلت او ستونزې چې اوس له افغانستان څخه ایستل شوي افغانان ورسره مخ دي، د زغم وړ نه دی.
