اوکراین: لویدیځ دې له ځنډ پرته دفاعي سیستم په واک کې راکړي

د اوکراين د بهرنيو چارو وزير ديميتري کوليبا پر لويديځو هېوادونو غږ کړی چې کيېف ته پاټريوټ دفاعي سيسټم ورکړي. کوليبا له سي اېن اېن ټلويزيون سره په مرکه کې ويلي چې دوی پر اوکراين د روسيې د بريد په لومړيو کې هم له خپلو لويديځو متحدينو د پاټريوټ دفاعي سيستم غوښتنه کړې وه خو په وينا يې چې هغه مهال دغه سيسټم په واک کې ور نه کړل شو. ده زياته کړې چې اوس د دې وخت دی چې لويديځ هېوادونه، په ځانګړي ډول د امريکا متحد ايالتونه اوکراين ته د دغه سيسټم د ورکړې لپاره ګام پورته کړي. پاټريوټ د تکتيکي او بالسټيکي توغنديو د دفاع پر مختللی سيسټم دی چې په هر ډول اقليمي شرایطو، هر ډول واټن او ارتفاع کې د توغنديو د شنډولو وړتيا لري. دغه سيسټم د توغنديزې دفاع تر ټولو پرمختللی سیسټم بلل کيږي چې يوه امريکايي شرکت جوړ کړی او د نړۍ لږ هېوادونه ترې برخمن دي. اوکراين په داسې حال کې له امريکا د پاټريوټ دفاعي سيسټم غوښتنه کړې چې د دغه هېواد د انرژۍ تاسيسات د روسيې تر سختو توغنديزو بريدونو لاندې دي او د ګڼ شمېر سيمو برېښنا يې پرې شوې ده.